नेपाल पूर्वाधार 
काठमाडौं । आगामी बैशाख ५ र ६ गते (अप्रिल १८ र १९) का लागि तय भएको आठौं संस्करणको ऊर्जा सम्मेलन २०२३ (पावर समिट) को तयारी अन्तिम चरणमा पुगेको छ । सम्मेलनको आयोजक स्वतन्त्र ऊर्जा उत्पादकहरूको संस्था, नेपाल (इपान) ले बुधबार राजधानीमा पत्रकार सम्मेलन गरी ऊर्जा सम्मेलनको सम्पूर्ण तयारी अन्तिम चरणमा पुगेको जानकारी दिएको हो ।
सम्मेलनको प्रधानमन्त्री पुष्पकमल दाहालले उद्घाटन गर्ने कार्यक्रम छ । २ दिने सम्मेलनमा नेपालको विद्युत खरिद गर्ने भारतीय खरिदकर्ता कम्पनी र निजी जलविद्युत कम्पनीहरूबीच प्रत्यक्ष विद्युत खरिद सम्झौता (पिपिए) का लागि समझदारीपत्रमा हस्ताक्षर गर्ने कार्यक्रम तय भएको इपान अध्यक्ष कृष्ण आचार्यले बताए ।
उनका अनुसार नवीकरणीय ऊर्जाको विकास र बजार विस्तारका लागि अन्य सम्झौता र समझदारीहरूमा पनि सम्मेलनमा हस्ताक्षर हुनेछ । सम्मेलन देशमा उत्पादन हुने विद्युतको बजार विस्तारमा कोशेढुंगा साबित हुने बताउँदै आचार्यले दक्षिण एसियाको लगानी जुटाउने सम्बन्धि ‘साउथ एसियन फोरम अन इनर्जी इन्भेष्टमेन्ट’ प्रतिवेदन सार्वजनिक गरिने बताए ।
सम्मेलनमा १५ वटा सत्र सञ्चालन गरिनेछ । सम्मेलनमा लगानी बोर्ड नेपाल र निजी क्षेत्रका तर्फबाट ५ हजार मेगावाटका जलविद्युत परियोजना प्रदर्शनी (सो केस) मा राखिने इपानका उपाध्यक्ष आशिष गर्गले बताए। प्रदर्शनीमा राखिने परियोजनाबारे स्वदेशी विदेशी लगानीकर्ताले सम्पूर्ण जानकारी प्राप्त गर्न सक्ने उनले बताए ।
सम्मेलनमा ऊर्जा, जलस्रोत तथा सिँचाइ मन्त्रालयका पदाधिकारी तथा दक्षिण एसियाली देशका नेताहरूको पनि सहभागीता रहनेछ । उद्घाटन सत्रमा भारत, बंगलादेश, भुटान र श्रीलंकाका ऊर्जा मन्त्रीहरूलाई पनि सहभागीताका लागि आमन्त्रण गरिएको पत्रकार सम्मेलनमा जानकारी दिइयो ।
सम्मेलनमा विश्वका ३० भन्दा बढी देशका ३ सय जना अन्तर्राष्ट्रिय प्रतिनिधिसहित नेपालबाट सरकारका उच्च पदस्थ पदाधिकारी, विद्युत व्यापार कम्पनीका प्रतिनिधि, ऊर्जा उत्पादकहरू, लगानी गर्ने बैंक तथा वित्तीय संस्थाका प्रतिनिधि, परामर्शदाता कम्पनीका प्रतिनिधि, प्रसारण तथा वितरण कम्पनीका प्रतिनिधिलगायत गरी ८ सय जनाभन्दा बढीको सहभागिता रहनेछ ।
सम्मेलनमा विशेष गरी ठूलो संख्यामा भारतीय प्रतिनिधिमण्डलको सहभागिता रहने इपानले जनाएको छ । ‘हरित ऊर्जाको बजार विस्तारीकरण’ भन्ने नारा दिएर राजधानीको हायात होटलमा आठौं संस्करणको ऊर्जा सम्मेलन हुँदैछ । यसअघि चैत १४ र १५ गतेका लागि तय भएको सम्मेलन विविध कारणले यो मितिमा गर्न सम्भव नभएपछि बैशाख ५ र ६ गतेका लागि सारिएको थियो ।
ऊर्जा, जलस्रोत तथा सिँचाइ मन्त्रालय ऊर्जा सम्मेलनको संरक्षक रहने इपानले जनाएको छ । इपानका अनुसार नेपालस्थित भारतीय दूतावास ऊर्जा सम्मेलनको ‘कन्ट्री पार्टनर’ रहनेछ । विश्व बैंक, आइएफसी,एफएमओ, युएसआइडी लगायत विकास साझेदार प्रयोजक छन् ।
इपानले सन् २००६ मा पहिलो पटक ऊर्जा सम्मेलनको आयोजना गरेको थियो । त्यस यता नियमितरूपमा ऊर्जा सम्मेलनको आयोजना गर्दै आइरहेको छ ।
