नेपाल पूर्वाधार 
म्याग्दी । म्याग्दी र मुस्ताङ राष्ट्रिय राजमार्गसँग जोड्ने मालढुङ्गा-बेनी सडक खण्ड ४ दिनपछि सुचारु भएकाे छ । भीषण वर्षाका कारण पहिराे खसेपछि अवरुद्ध याे सडक खण्ड शुक्रबारबाट खुलेकाे हाे ।
पर्वतको जलजला गाउँपालिका–७, केराबारीमा पहिरो खसेपछि असोज २४ गतेदेखि अवरुद्ध हुन पुगेकाे याे सडक खण्ड मर्मत गरेर सञ्चालनमा ल्याइएकाे मिलनचोक प्रहरी चौकीले जनाएको छ । प्रहरीका अनुसार पहिरो पन्छाएपछि पर्वतको कुश्मा नगरपालिका-१, मालढुङ्गादेखि जलजला गाउँपालिका हुँदै म्याग्दीको बेनी जोड्ने सडकमा यातायातका साधन सञ्चालन भएका छन् ।
बेनी–जोमसोम–कोरला सडक आयोजनाको ठेकेदार कम्पनी खड्का–कृष्णको सहायक ठेकेदार ओमकारेश्वरका २ वटा डोजर परिचालन गरेर पहिरो पन्छाइएको थियो । तत्कालका लागि यातायात सञ्चालन भए पनि थप पहिराको जोखिम भएकाले आवत–जावतका क्रममा सतर्कता अपनाउन र रातको समयमा ध्यान दिन आग्रह गरिएको मिलनचोक प्रहरी चौकीका प्रमुख मुक्त खड्काले बताए ।
स्तरोन्नतिका क्रममा रहेको मालढुङ्गा–बेनी सडकको केराबारी खण्डमा सडकमाथिको पाखो चिरा–चिरा परेको छ । सो ठाउँमा सडक विस्तारका लागि ठेकेदारले डोजर प्रयोग गरेर पहाड फुटाएको र जथाभावी ढुङ्गा निकालेकाले पहिरो गएको स्थानीयवासीले बताएका छन् ।
मालढुङ्गा–बेनी सडक अवरुद्ध भएपछि म्याग्दी र मुस्ताङ आउने जाने सवारीसाधनले मालढुङ्गा–बागलुङ–बेनी सडक खण्डकाे प्रयोग गरेका थिए । मालढुङ्गा–बागलुङ–बेनी सडकअन्तर्गत बेनी नगरपालिका–१ को रुइनेडाँडामा पहिराले सडक भासिएपछि सवारी सञ्चालनमा समस्या हुने गरेको छ ।
