नेपाल पूर्वाधार 
काठमाडौं । उर्जा दक्षताको प्रवद्र्धन तथा आधुनिक उर्जा प्रविधिको प्रयोगलाई बढावा दिई हरित अर्थतन्त्र विकासमा योगदान पुर्याउन वैकल्पिक उर्जा प्रवद्र्धन केन्द्र र नेपाल आँखा कार्यक्रम, तिलगंगा आँखा प्रतिष्ठान बिच समझदारी पत्रमा हस्ताक्षर भएको छ ।
केन्द्रको तर्फबाट कार्यकारी निर्देशक डा. मधुसुधन अधिकारी र प्रतिष्ठानको तर्फबाट प्रमुख कार्यकारी अधिकृत डा. रीता गुरुङले हस्ताक्षर गरे । समझादारी अनुसार तत्कालको लागि तिलगंगा अस्पतालको ऊर्जा दक्षता वृद्धि गर्नको लागि आवश्यक प्राविधिक सहयोग गर्नेछ । त्यसमार्फत अहिले अस्पतालले खपत गरिरहेको ऊर्जामा कमी आउनेछ ।
‘भविष्यमा भने तिलगंगा अस्पतालले देशका विभिन्न ठाउँमा निर्माण गर्ने अस्पतालमा ऊर्जा दक्षता वृद्धि गर्ने प्रणाली जडान गर्ने विषयमा सहकार्य हुनेछ’ वैकल्पिक ऊर्जा प्रवद्धन केन्द्रका कार्यकारी निर्देशक डा.मधुसुधन अधिकारीले भने ।
कार्यक्रममा प्रतिष्ठानका संचालक समिति सचिव प्राडा. सन्दुक रुइत लगायत अन्य पदाधिकारिहरुसंग छलफल समेत भएको थियो । मानव सेवामा समर्पित तिलगंगा आँखा प्रतिष्ठानलाई यस कार्यबाट हुने ऊर्जा तथा आर्थिक बचतबाट आँखासम्बन्धी अनुकरणीय कार्यको लागि थप सहयोग हुनेछ ।
प्रतिष्ठानले उर्जा दक्षतासम्बन्धी सुधारका कार्यक्रमहरु अनवरत रुपमा प्रवद्र्धन गर्ने उद्देश्य लिएको छ ।
