नेपाल पूर्वाधार 
सांकेतिक तस्बीर।
काठमाडौं। देशभर पछिल्लो २४ घण्टामा ८९ वटा सवारी दुर्घटना हुँदा ११ जनाको मृत्यु भएको छ भने १९१ जना घाइते भएका छन्। दुर्घटनाका घटनाले सडक सुरक्षाप्रति गम्भीर चुनौती देखाइरहेका बेला ट्राफिक प्रहरीले नियम उल्लङ्घन गर्ने हजारौं सवारीचालकमाथि कारबाही गर्दै १७ लाख ८६ हजार ५०१ रुपैयाँ राजस्व संकलन गरेको छ।
उपलब्ध तथ्यांकअनुसार सबैभन्दा बढी मानवीय क्षति बागमती प्रदेशमा भएको छ। बागमतीमा नौ जनाको मृत्यु र ३३ जना घाइते भएका छन्। काठमाडौं उपत्यकामा मात्रै २० जना घाइते भएका छन्, तर कुनै मानवीय क्षति भएको छैन।
कोशी प्रदेशमा ३९ जना घाइते भएका छन् भने मृत्युको घटना शून्य रहेको छ। मधेश प्रदेशमा एक जनाको मृत्यु हुँदा २४ जना घाइते भएका छन्। कर्णाली प्रदेशमा एक जनाको मृत्यु र आठ जना घाइते भएका छन्।
त्यस्तै लुम्बिनी प्रदेशमा छ जना र सुदूरपश्चिम प्रदेशमा नौ जना घाइते भएका छन्। यी दुवै प्रदेशमा मृत्युको घटना भएको छैन। गण्डकी प्रदेशमा पनि दुर्घटना भए तापनि मृत्यु तथा घाइतेको संख्या शून्य रहेको तथ्यांकमा उल्लेख छ।
प्रहरीका अनुसार अधिकांश दुर्घटना तीव्र गति, ट्राफिक नियमको उल्लङ्घन, चालकको लापरबाही तथा सडक सुरक्षासम्बन्धी कमजोरीका कारण भएको अनुमान गरिएको छ। बागमती प्रदेशमा सबैभन्दा बढी मृत्यु र कोशी प्रदेशमा सबैभन्दा बढी घाइते भएको तथ्यांकले देखाएको छ।
यसैबीच, काठमाडौँ उपत्यका ट्राफिक प्रहरी कार्यालयले पछिल्लो २४ घण्टामा दुई हजार ५९८ सवारीचालकलाई विभिन्न ट्राफिक नियम उल्लङ्घन गरेको अभियोगमा कारबाही गरेको जनाएको छ।
कार्यालयका अनुसार मादक पदार्थ सेवन गरेर सवारी चलाउने १९९ जना, नियमविपरीत ‘राइड सेयरिङ’ गर्ने १६७ जना, ट्राफिक बत्ती उल्लङ्घन गर्ने १२० जना तथा तीव्र गतिमा सवारी चलाउने १६८ जनामाथि कारबाही गरिएको छ।
यस्तै लेन अनुशासन पालना नगर्ने १२० जना, निषेधित क्षेत्रमा हर्न बजाउने १२६ जना, सडक पेटीमा पार्किङ गर्ने १५६ जना, एकतर्फी सडकमा सवारी चलाउने १८६ जना तथा अन्य विभिन्न ट्राफिक नियम उल्लङ्घन गर्ने एक हजार ३५६ जनालाई पनि कारबाही गरिएको प्रहरीले जनाएको छ।
ट्राफिक प्रहरीले सडक दुर्घटना न्यूनीकरणका लागि सवारीचालकलाई ट्राफिक नियमको पूर्ण पालना गर्न, मादक पदार्थ सेवन गरेर सवारी नचलाउन तथा निर्धारित गतिमा मात्रै सवारी सञ्चालन गर्न आग्रह गरेको छ।
