नेपाल पूर्वाधार 
काठमाडौं । बर्दियाको गुलरिया नगरपालिका–४ स्थित बबई नदीको जब्दीघाटको पुल पुनर्निर्माण गर्न स्थानीयबासीले सरकारसँग माग गरेका छन् । उनीहरूले २०७४ साल साउन २८ गतेको बाढीले भासिएको तथा २०७९ सालमा आएको बाढीले प्रयोग नै गर्न नमिल्ने गरी क्षतिग्रस्त यो पुल तल्काल पुनर्निर्माण गर्न माग गरेका हुन् ।
गुलरियास्थित जब्दीघाट पुन पुनर्निर्माण जनअभियान समिति तथा राधाकृष्ण थारु जनसेवा केन्द्रले मंगलबार पत्रकार सम्मेलन गरी अर्थमन्त्रालयले पुलको पुनर्निर्माणका लागि आवश्यक बजेट निकासा गरी ६ वर्षदेखि अलपत्र अवस्थाको पुलको पुनर्निर्माण तत्काल गरिदिनु पर्ने माग राखेका छन् । सम्भव भएसम्म पुनानै स्थानमा पुलको पुनर्निमाण गरिदिनु पर्ने र यो सम्भव नभएको अवस्थामा नजिकै नयाँ पुल निर्माण गरी स्थानीयको आवत–जावत सहज बनाइदिनु पर्ने पनि उनीहरूले माग राखेका छन् ।
गुलरियाको बगही गाउँ र बारबर्दिया नगरपालिका–११ को खुन्तिपुर जोड्ने यो पुलमा बाढीले क्षति पुर्याएपछि विगत ६ वर्षदेखि प्रयोग बिहिन अवस्थामा छ । २०७४ साल साउनमा आएको बाढीले भासिएको यो पुल २०७९ असोज २० गतेको बाढीले थप क्षतिग्रस्त बनेपछि आवागमन गर्न नसकिने गरी भत्किएको थियो ।
यो पुलको पुनर्निर्माण हुन नसक्दा जब्दीघाटमा घाट ठेकेदारले सञ्चालन गरेको डुंगा र अस्थायी कच्ची काठेपुलबाट यात्रा गर्नुपर्ने स्थानीयलाई बाध्यता छ । हिउँदमा आवत–जावत गर्न सहजै भएपनि बर्खामा यसरी यात्रा गर्नु जोखिमयुक्त हुने गरेको स्थानीय बताउँछन् ।
पुल नबन्दा अस्थायी काठेपुल प्रयोग गरेबापत पटके शुल्क तिर्नुपर्ने बाध्यता छ भने विद्यार्थी, बालबालिका, गर्भवची÷सुत्केरी महिला तथा विरामीलाई आवत–जावत गर्न कठिनाई हुँदै आएको छ ।
