नेपाल पूर्वाधार 
काठमाडौं । काभ्रेको ऐतिहासिक नगरी पनौतीदेखि नमोबुद्धसम्म विश्व सांस्कृतिक शान्ति पदयात्रा हुने भएको छ । जिल्ला समन्वय समिति काभ्रे र काभ्रे सेवा समाजले संयुक्त रुपमा आगामी असोज ६ गते अर्थात शनिबार शान्ति पदयात्रा आयोजना गर्न लागेको हो ।
विश्व शान्ति दिवसको अवसरमा असोज ४ देखि ६ गतेसम्म समिति र समाजले विभिन्न कार्यक्रम आयोजना गर्न लागेको छ । पदयात्रामा एक हजार जना सहभागी हुने गरी तयारी अघि बढाएको समाजका अध्यक्ष प्रल्हाद केसीले जानकारी दिए । उनका अनुसार, पनौतीदेखि नमोबुद्धसम्मको दुरी ९.८ किलोमिटर छ ।
‘ऐतिहासिक, धार्मिक र प्राकृतिक रुपमा रमणीय क्षेत्रमा पर्यटन प्रवद्र्धन गर्ने उद्देश्यसहित विश्व शान्ति पदयात्राको रुपमा आयोजना गर्न लागेका छौ ।’ उनले भने, ‘पदयात्राले यस क्षेत्रको महत्व र पहिचान वृद्धिमा सहयोग गर्छ ।’
पनौतीस्थित राजकुमार महासत्वको दरबारबाट सुरु भएर पनौती बजार, त्रिवेणीघाट, सुन्थान, इट्टे, शंखु, शंखेश्वरी र अन्त्यमा नमोवुद्ध पुगेर समापन हुने कार्यक्रम छ । पनौती र नमोवुद्धमा आन्तरिक तथा वाह्य पर्यटन क्षेत्रको प्रवद्र्धनका साथै स्थानीय कला, संस्कृतिको संरक्षण, दुवै क्षेत्रलाई विश्व सम्पदा क्षेत्र र धार्मिक सर्किटको रुपमा विकासका लागि पहल गर्ने तथा पनौतीदेखि नमोवुद्धसम्म डेडीकेटेड पदमार्ग निर्माण गर्ने उद्देश्यसहित पदयात्राको रुपमा आयोजना गरिएको समाजले जनाएको छ ।
परापूर्व कालमा भगवान नमोबुद्ध महासत्वको पिता राजा महारथको राज्य रहेको पाञ्चाल अर्थात पनौतीदेखि नमोबुद्ध महासत्वले दुब्ली बघिनीका ५ डमरुलाई आफ्नो शरीरको मासु दान गराएर बचाएको नमोवुद्ध ऐतिहासिक र धार्मिक रुपमा रुपमा चर्चित छ । लुम्बिनीमा सिद्धार्थ गौतम जन्मनुभन्दा ३५ सय बर्ष गौतमवुद्ध जन्मेको पहिलो जन्मस्थलको रुपमा नमोवुद्धलाई लिइने गरिएको छ ।
