नेपाल पूर्वाधार 
काठमाडौँ । परोपकार प्रसूति तथा स्त्रीरोग अस्पतालले अनलाइन टिकेटिङ शुरु गरेको छ । अस्पतालले ६४ औँ वार्षिकोत्सवको अवसरमा बुधबारदेखि सो सेवा शुरु गरिएको हो । बिरामीको चापलाई देष्टिगत गरेर यस्तो व्यवस्था गरिएको अस्पतालले बताएको छ ।
बुधवारदेखि अनलाइन टिकट र थप एक–एक वटा बिलिङ र टिकट काउन्टर समेत सञ्चालनमा ल्याइएको छ । सेवाग्राहीका लागि औषधि खरिद सहज बनाउन फार्मेसी काउन्टर पनि थपेको छ । गरिबीको रेखामुनि रहेकाहरूको लागि स्त्रीरोग अस्पतालमा जनरलतर्फ ४५० शय्या निःशुल्क गरिएको अस्पतालमा निर्देशक श्रीप्रसाद अधिकारीले बताए ।
गत आर्थिक वर्ष २०७९/८० मा अस्पतालमा कुल ३४ हजार १ सय ८५ जना महिला बिरामी भर्ना भएकामा प्रसूतितर्फ २६ हजार ९ सय ४७ तथा स्त्री रोगतर्फ ५ हजार ४६ रहेका अधिकारीको भनाई थियो । नवजात शिशु सघन उपचारतर्फ २ हजार १९२ र मातृ सघनतर्फ ४८३ भर्ना भएर उपचार पाएको दाबी उनको छ । गत आर्थिक वर्षमा अस्पतालले बहिरङ्ग सेवातर्फ १ लाख ८० हजार ८९० जना महिलाहरूले सेवा लिएका थिए ।
