Nepal Purbadhar

शुक्रबार, साउन ४, २०८१
Friday, July 19, 2024

शुक्रबार, साउन ४, २०८१
Friday, July 19, 2024

८ महिनामा ५ लाख ६१ हजार सवारीसाधन कारबाहीमा


काठमाडाैं । काठमाडौं उपत्यकामा ट्राफिक नियम उल्लङ्घन गर्ने ५ लाख ६१ हजार तीन सय ७५ सवारीसाधन कारबाहीमा परेका छन् ।

काठमाडौं उपत्यका ट्राफिक प्रहरी कार्यालयले चालु आर्थिक वर्षको ८ महिनामा ट्राफिक नियम उल्लङ्घन गरेको अभियोगमा उक्त सवारीसाधनलाई कारबाही गरेको हो ।

कार्यालयका अनुसार सबैभन्दा बढी सवारी अड्याउन निषेध गरेको ठाउँमा सवारी राखेको कसुरमा ८८ हजार ४७२ सवारीसाधन कारबाहीमा परेका छन् । यस्तै बढी भाडा लिने २ हजार १९०, सवारीचालक अनुमतिपत्र प्राप्त नगरेका ३६ हजार ३४०, हदभन्दा बढी मानिस वा सामान बोक्ने १३ हजार ५०९, मादक पदार्थ सेवन गरी सवारीसाधन चलाउने ३७ हजार ८९६ सवारी कारबाहीमा परेका छन् ।

यसैगरी क्षमताभन्दा बढी यात्रु बोक्ने दुई हजार ४५, रेड लाइटमा सवारी चलाउने १६ हजार ९६८, सवारी मोड्न निषेध गरेको ठाउँमा सवारी मोड्ने १५ हजार २५९, लेन अनुशासन उल्लङ्घन गर्ने १९ हजार ८१७, वानवेमा सवारी चलाउने २१ हजार १२३, अवस्था ठीक नभएका सवारी चलाउने २८ हजार ८९९, सवारी चलाउन निषेध गरिएको ठाउँ र समयमा सवारी चलाउने १६ हजार २४७ सवारीलाई कारबाही गरेको हो ।

पेटी र हेल्मेट नबाँधी सवारीसाधन चलाउने २१ हजार ९८१, लापरवाही साथ सवारी चलाउने ७२ हजार १४४, कागजपत्र साथमा नराखी सवारी साधन चलाउने ४४ हजार ३८, सवारी वजन हद निर्धारण गरेको क्षेत्रमा बढी वजनको सवारी चलाउने २० हजार ६६५, जथाभावी हर्न बजाउने १२ हजार ६२२, सार्वजनिक स्थानमा बाधा पुग्ने गरी सवारी राख्ने ३७ हजार २६५ र ओभर स्पिडमा सवारी चलाउने २५ हजार ७८२ सवारीसाधन कारबाहीमा परेका छन् ।

कार्यालयका प्रवक्ता प्रहरी वरिष्ठ उपरीक्षक राजेन्द्रप्रसाद भट्टले पछिल्लो समय उपत्यकामा ट्राफिक नियम उल्लङ्घन गर्ने सवारीसाधनमाथि ट्राफिक प्रहरीले विशेष निगरानी बढाउँदै आएको जानकारी दिए । ‘ट्राफिक नियम उल्लङ्घन गर्दा दुर्घटनाको सङ्ख्या बढेकाले हामीले यसलाई विशेष कडाइ गरेका हौ’, उनले भने ।

हाल काठमाडौँ उपत्यकाभित्र २० लाख हाराहारीमा सवारीसाधन आवतजावत हुँदै आएको जनाइएको छ । उक्त सवारीसाधन व्यवस्थापनका लागि काठमाडौँ उपत्यका ट्राफिक कार्यालयबाट एक हजार सात सय ट्राफिक प्रहरी परिचालन हुँदै आएको छ ।


Read Previous

मेघौली विमानस्थल स्तराेन्नतिकाे लागि धावनमार्गमा ग्रावेल बिछ्याइँदै

Read Next

एकीकृत पानी व्यवस्थापनसम्बन्धी कानुनमा जोड दिदै सकियो वर्षातको पानी सङ्कलनसम्बन्धी सम्मेलन

Leave a Reply

Your email address will not be published. Required fields are marked *