नेपाल पूर्वाधार 
काडमाडौं । संस्कृति, पर्यटन तथा उड्डयन मन्त्रालयअन्तर्गतको पर्यटन विभागले विना इजाजत साहसिक पर्यटकीय पूर्वाधार नबनाउन ध्यानाकर्षण गराएको छ । कानुनअनुसार तोकिएको प्रक्रिया पुरा नगरी यस्तो पूर्वाधार तथा क्रियाकलाप सञ्चालन गरेमा कारवाही हुने विभागले बताएको छ ।
नेपालमा पछिल्लो समय बन्जी जम्पिङ, स्विङ, क्यानोनिङ, स्काइ डाइभिङ, जिप फ्लाइङ, हाइ रोप्स, स्काइ वाक, प्याराग्लाइडिङ, अल्ट्रालाइट, एम्यूजमेन्ट पार्क, फन पार्कजस्ता उत्पादनमा लगानी बढेको छ ।
यस्ता गतिविधिहरू सञ्चालन गर्नेमध्ये कतिपयले उद्योग /व्यवसाय दर्ता नगरी, इजाजत नलिई, नवीकरण नगराइ सञ्चालन गरेको पाइएको भन्दै विभागले ध्यानाकर्षण गराएको हो । दर्ता नगरी वा इजाजत नवीकरण नगरी यस्ता व्यवसाय सञ्चालन गरेमा दण्ड सजाय र जरिवानाको प्रक्रिया थाल्ने समेत विभागले जानकारी दिएको छ ।
२ करोडदेखि ५ करोड रुपैयाँसम्म लगानी हुने यस्ता गतिविधिका लागि पूर्वाधार बनाउनु अगाडि संक्षिप्त वातावरणीय अध्ययन प्रतिवेदन समेत पास गर्नुपर्ने प्रावधान रहेको बताउँदै विभागले सो नगरेमा कारवाही गर्ने चेतावनी समेत दिएको छ।
