नेपाल पूर्वाधार 
काठमाडौं । बंगलादेश सरकारले ३ महिनाभित्र नेपालबाट ४० देखि ५० मेगावाट बिजुली खरिद गर्ने भएको छ । नेपाल र बंगलादेशबीच ऊर्जा सहकार्यका लागि गठित सचिवस्तरीय संयुक्त सञ्चालन समिति (जेएससी) को बैठकमा यस्तो सहमति भएको हो ।
बंगलादेशसम्म नेपालकाे विद्युत पुर्याउन भारतीय भूमिकाे प्रयाेग हुने हुँदा यसका लागि नेपाल, भारत र बंगलादेशबीच त्रिपक्षीय बैठक बसी टुंग्याउने निर्णय भएको छ । बिहीबार नेपालको तर्फबाट ऊर्जा, जलस्रोत तथा सिँञ्चाइ मन्त्रालयका सचिव शुशीलचन्द्र तिवारी र बंगलादेशको तर्फबाट विद्युत, ऊर्जा र खनिज स्रोत मन्त्रालयका सचिव मोहम्मद हबिबुर रहमानकाे नेतृत्वमा जेएससी बैठक सबेको थियो ।
ऊर्जा मन्त्रालयका सह–सचिव एवं प्रवक्ता मधु भेटुवालले बैठकले बंगलादेशको भेडमारा–एचपीडीसीको संरचनामा नेपालबाट ४० देखि ५० मेगावाट हाई भोल्टेज डारेक्ट करेण्ट लान सक्ने अवस्था देखिएकोले यसका लागि तीन महिनाभित्र त्रिपक्षीय बैठक बसेर टुंगो लगाउने निर्णय भएको बताए ।
उनका अनुसार, यसका लागि नेपाल विद्युत प्राधिकरण, भारतीय विद्युत व्यापार कम्पनी (एनभीभीएन) र बंगलादेश पावर डेलभपेन्ट बोर्डबीच बैठक बस्नेछ । बंगलादेश सरकारले नेपालबाट बिजुली आयात गर्ने योजना अघि सारेपछि यसलाई जेएससी बैठकले मूर्त रूप दिएकाे हाे । यो कार्यान्वयन भएमा दुई देशबीचको बिजुली व्यापारका लागि ठूलाे कोशेढुंगा सावित हुनेछ ।
बैठकमा नेपाल र वंगलादेशबीच विद्युत व्यापार सम्झौता (पीटीए) गर्नका लागि आवश्यक तयारी अघि बढाउने सहमति समेत भएको छ । साथै नेपाल र बंगलादेशबीच डेडीकेटेड प्रसारण लाइन निर्माणका लागि दुवै देशले पहल गर्ने निर्णय समेत गरेको प्रवक्ता भेटुवालले जानकारी दिए ।
