नेपाल पूर्वाधार 
काठमाडौं । नेपालको नवीकरणीय ऊर्जा प्रवर्द्धन गर्न औद्योगिक घराना दुगड समूह र भारतको टाटा पावरबीच सहमति भएको छ । टाटा पावरको भगिनी कम्पनी टाटा पावर नवीकरणीय ऊर्जा लिमिटेड (टिटिआरइएल) र दुगड समूहको सहायक दुगड पावर कम्पनीबीच नवीकरणीय ऊर्जाको क्षेत्रमा सहकार्य गर्ने सहमति बनेको हो ।
टाटासँगको सहकार्यले नेपालमा नवीकरणीय ऊर्जा उत्पादनमा भइरहेको विकासमा महत्त्वपूर्ण योगदान पुग्ने दुगड समूहले जनाएको छ । सहकार्यले नवीकरणीय ऊर्जाको विकासमा नेपालले चालेको कदमलाई बढावा दिन सम्भव हुने दुगडको प्रेस बक्तव्यमा जनाइएको छ ।
टाटा पावर भारतका पावर कम्पनीहरूमध्ये सबैभन्दा ठूलो कम्पनी हो । टाटा पावरसँगको सहकार्यले दुगड पावरलाई नेपालमा दीगोरूपमा नवीकरणीय ऊर्जा उत्पादनको आधार खडा हुने पनि बक्तव्यमा भनिएको छ । सहमतिअनुसार टिटिआरइएल र दुगडले नेपालमा सौर्य विद्युत उत्पादनको क्षेत्रमा लगानी गर्ने छन् ।
सहमति अनुसार सौर्य ऊर्जा प्रविधिबाट विद्युत उत्पादन गरी आपूर्ति व्यवस्थापन गर्न १ किलोवाटदेखि १ मेगावाटसम्मका सौर्य विद्युत आयोजनामा लगानी हुनेछ । दुगडसँगको सहकार्यका क्रममा टिटिआरइएलले सौर्य विद्युत आयोजनाको अध्ययन, डिजाइन, खरिद, निर्माण, बजार व्यवस्थापनसँगै मर्मत सम्भारको काम पनि गर्नेछ ।
दुगड पावरसँगको सहकार्यले नेपालको नवीकरणीय ऊर्जा क्षेत्रको इन्जिनियरिङ्गलाई पुनःपरिभाषित गर्ने रणनैतिक एकता भएको टाटा पावर नवीकरणीय ऊर्जा लिमिटेडका प्रमुख कार्यकारी अधिकृत आशिष खन्नाले बताए । उनले दुगडसँग जोडिएर नेपालको विद्युतीय ऊर्जाको सम्भाव्य बजारभित्र प्रवेश गर्न लागेको बताए ।
‘हामी नेपालको नवीकरणीय ऊर्जाको क्षेत्रमा काम गर्नका लागि दुगड समूहसँग जोडिएका छौं,’ उनले भने, ‘हाम्रो सहकार्यले यो क्षेत्रमा सकारात्मक र परिवर्तनशील प्रभाव पारोस् भन्ने चाहाना छ । दुवै कम्पनीबीचमा वित्तीय स्रोत र विज्ञताको एकताले नवीकरणीय ऊर्जाको दीगो विकासबाट प्रसारण प्रणालीमा नयाँ आयाम थपिने उनको भनाइ छ ।
टिटिआरइएलसँगको सहकार्य नेपालको नवीकरणीइ ऊर्जा क्षेत्रका लागि उपलब्धीमुलक हुने दुगड पावर प्रा.लि.का व्यवस्थापकीय निर्देशक अभिशेक दुगडले बताए । उनले नेपालको विद्युत उत्पादनमा योगदान गरी दीगो, गुणस्तरीय र आत्मनिर्भर बनाउन टिटिआरइएलसँगको सहमति एकता भएको पनि बताए ।
‘आर्थिक विषयमा हाम्रा साझा सरोकार पनि छन् । नेपालको हरेक कुनामा स्वच्छ नवीकरणीय ऊर्जा पुर्याउने कुरामा हामी प्रतिबद्ध छौं । दीगो रूपमा नवीकरणीय ऊर्जा उत्पादनमा योगदान गर्न यो साझेदारी भइरहेको छ,’ उनले भने ।
टिटिआरइएल भारतमा नवीकरणीय ऊर्जा क्षेत्रको नेतृत्वदायी भूमिकामा रहँदै आएको छ । यो कम्पनीले विश्वभर सौर्य विद्युत आयोजनामा जडान हुने सेल र मोडुल बेचेको छ ।
उसले नेदरल्याण्डमा ३.४ मेगावाटको तथा अमेरिकामा ३.३७६ मेगावाट सौर्य विद्युत आयोजनाका लागि पनि सौर्य विद्युत आयोजनामा पनि काम गरेकाे छ ।
