नेपाल पूर्वाधार 
काठमाण्डौं । नेकपा एमालेका सांसद योगेश भट्टराईले भारतबाट बिजुली किन्दा नेपाल विद्युत् प्राधिकरण टाट पल्टिने अवस्थामा पुगेको बताएका छन् ।
संसदमा आर्थिक वर्ष २०७९/८० का लागि विनियोजन विधेयकका सिद्धान्त र प्राथमिकता सम्बन्धमा बुधबारदेखि सुरु भएको छलफलमा बोल्दै उनले भारतबाट महंगो दरमा विद्युत किनेर सस्तो दरमा बिक्री गर्दा प्राधिकरण टाट पल्टने अवस्थामा पुगेको बताएका हुन् ।
‘हामीले मित्र राष्ट्र भारतबाट महंगोमा बिजुली आयात गरिरहेका छौ । र, यो बिजुली सस्तोमा बेचिरहेका छौं ’, उनले भने, ‘यसले विद्युत प्राधिकरणलाई क्रमशः घाटामा लगिरहेकाे छ ।’ उनले महंगोमा किनेको बिजुली सस्ताेमा बिक्री गर्ने अवस्था रहिरहने हाे भने प्राधिकरण टाट पल्टिने बताए । उनले प्राधिकरणलाई टाट पल्टिनबाट जोगाउने विषयमा सिद्धान्त तथा प्राथमिकतामा राख्नु पर्नेमा जाेड दिए ।
पछिल्लो समयमा युक्रेन–रसिया युद्धका कारणले ऊर्जा संकट बढेर भारतमा विद्युतको भाऊ महंगो भएपछि प्राधिकरणले हाल प्रतियुनिट १२ रुपैयाँ भारतीय रुपैयाँसम्ममा बिजुली आयात गरिरहेको छ । प्राधिकरणले यस अघि केही समयका लागि प्रति युनिट २० भारतीय रुपैयाँमा समेत खरिद बिजुली खरिद गरेर सस्ताे दरमा बिक्री वितरण गरेकाे थियाे । यहिले भने भारतीय बिजुलीको भाऊ घट्ने क्रममा छ ।
सांसद भट्टराईले अर्थमन्त्रीले हरेक महिना १० प्रतिशत पूँजीगत खर्च गर्न दिएको निर्देशन मन्त्रालयहररूले नमानेको उल्लेख गर्दै वर्तमान सरकारलाई राज्य संयन्त्रले नपत्याएको बताए । उनले सरकारले एमसीसीको विषयलाई अनावश्यक गिजोलेर दातृ निकायको विश्वास गुमाउने काम गरेको आरोप समेत लगाए ।
इन्धनमा भएको अत्यधिक मूल्यवृद्धिले दैनिक उपभोग्य सामग्रीमा मूल्यवृद्धि भएको र यसको वैकल्पिक उपाय सरकारले नअपनाएका कारण नागरिककाे जीवन कष्टकर बन्दै गएको उनले बताए । अहिले ठूला आयोजनाहरूको प्रगति निकै सुस्त भएको भन्दै उनले पर्याप्त ध्यान नदिन नसक्दा देशभित्रै रोजगारीको अभाव भएकाले नागरिक अवसरका लागि विदेशिन बाध्य भएको टिप्पणी गरे ।
