नेपाल पूर्वाधार 
म्याग्दी । म्याग्दीको रघुगंगा गाउँपालिकामा निर्माणाधीन जलविद्युत् आयोजनाले प्रयोग गर्ने पहुँचमार्ग जीर्ण हुँदा दुर्घटनाको जोखिम बढेको छ । पहुँच मार्ग जीर्ण हुँदै गएपछि विश्वको सातौँ अग्लो धवलागिरि (८१६७ मिटर) हिमालको फेदीमा मुहान रहेको राहुघाट र सहायक नदीमा निर्माणाधीन १६७.३ मेगावाट क्षमताका ५ वटा जलविद्युत् आयोजनालाई निर्माण सामाग्री तथा उपकरण ढुवानीमा समस्या भएकाे हाे ।
तिल्केनीचौरदेखि मौवाफाँट–दग्नाम–दर्मीजा–चिमखोला–घ्याँसीखर्क हुँदै सेतिनी उपत्यकासम्म जलविद्युत् आयोजनाले उपकरण र निर्माण सामग्री ढुवानी गर्न बनाएको सडक साँघुरो, धुलो र ग्रेड नमिलेका कारण जोखिमयुक्त बनेको रघुगंगा गाउँपालिका–३ का वडाध्यक्ष खिमबहादुर शाहीले बताए ।
“पहुँचमार्ग मर्मत र स्तरोन्नति गर्न जलविद्युत् आयोजनाले उदाशिनता देखाउँदा जोखिम बढेको छ”, उनले भने, “मौवाफाँटदेखि दग्नाम जोड्ने बुग्ल, दवाङभित्र क्षेत्रको सडक सबैभन्दा जोखिमयुक्त बनेको हो । सम्बन्धित जलविद्युत् आयोजनालाई तत्कालन मर्मत गर्न ध्यानाकर्षण गराएका छौँ ।”
रघुगङ्गा गाउँपालिकामा ४० मेगावाट क्षमताको राहुघाट, २२.५ मेगावाट क्षमताको ठूलोखोला, ४८ मेगावाट क्षमताको अपर राहुघाट, ३७.५ मेगावाट क्षमताको मङ्गले राहुघाट र २१.३ मेगावाटको ठूलोखोला जलविद्युत् आयोजना निर्माणाधीन छन् ।
जलविद्युत् आयोजना र निर्माण कम्पनीका प्रतिनिधि तथा स्थानीय सरोकारवालासमेतको गत हप्ता गाउँपालिकाको कार्यालयमा बसेको बैठकले बेनी–जोमसोम सडकखण्डस्थित घुमाउने तालदेखि पिप्ले हुँदै मौवाफाँट क्षेत्रको सडकलाई लेबलिङ, ग्रेडिङ र ग्राभेलसहित सडक स्तरोन्नति गर्ने सहमति भएको अध्यक्ष भवबहादुर भण्डारीले बताए ।
घुमाउनेतालदेखि च्यानडाँडासम्मको सडकमा रघुगङ्गा हाइड्रोपावर कम्पनीले सडक लेवलिङ र ग्रेडिङ तथा सडक ग्राभेलको कार्य गर्ने र राहुघाट जलविद्युत्को ठेकेदार जेपी एसोसियट्स कम्पनीले घुमाउने तालदेखि झिँ र दग्नाम जाने चोकसम्म तथा रघुगङ्गा माविको सरसाफ्टसम्मको नालीको काम गर्ने निर्णय भएको गाउँपालिकाले जनाएको छ ।
त्यसैगरी, च्यानडाँडादेखि अँधेरीखोला र माथिल्लो भेगको सडक मर्मत गर्नुपर्ने स्थानसम्म सडक लेवलिङ र ग्रेडिङ तथा सडक ग्राभेल निर्माण कार्य तुँदी पावर कम्पनी, ठुलोखोला र माथिल्लो ठूलोखोला जलविद्युत् आयोजनाले गर्ने निर्णय भएको गाउँपालिका अध्यक्ष भण्डारीले बताए ।
“सडक स्तरोन्नतिको लागत अनुमान तयार गर्ने र नापजाँचमा गाउँपालिकाका प्राविधिकलाई खटाउँछौँ, पटक–पटकको सहमति जलविद्युत् आयोजनाले कार्यान्वयन नगर्दा समस्या उत्पन्न भएको छ”, उनले भने, “यसपटकको निर्णयलाई पालना गराउन गाउँपालिकाले निरन्तर पहलकदमी लिन्छ ।”
