नेपाल पूर्वाधार 
काठमाडौं । अर्थमन्त्री प्रकाशशरण महतले गैरआवासीय नेपालीहरूलाई जलविद्युतमा लगानी गर्न आग्रह गरेका छन् । राजधानीको सोल्टी होटलमा मंगलबारबाट सुरु भएको गैरआवासीय नेपाली संघ (एनआरएनए) को ११औं विश्व अधिवेशनलाई सम्बोधन गर्दै महतले जलविद्युत आयोजनाहरूमा लगानीका लागि आह्वान गरेका हुन् ।
‘अहिले जलविद्युत क्षेत्रको विकासमा वृहत सञ्जाल बनिसकेको छ । २०४६ सालपछि १/२ मेगावाटका आयोजनामा लगानी गर्ने निजीले ३०० मेगावाटका आयोजना अगाडि बढाइरहेको छ,’ उनले भने, ‘विश्वभर छरिएका गैरआवासीय नेपालीलाई पनि यो क्षेत्रमा लगानी बढाउन म आग्रह गर्छु ।’
उनले हजारौं नेपालीले सयौं जलविद्युत आयोजनामा लगानी गरिरहेकाले विदेशमा रहेका नेपालीका लागि समेत लगानीको ठूलो अवसर रहेको बताए । विश्व बैंकले माथिल्लो अरुणमा १.७ बिलियन अमेरिकी डलर बराबरको लगानी गर्ने प्रतिबद्धता जनाएको उनको भनाई छ ।
‘माथिल्लो अरुण र दूधकोसी आयोजनामा विश्व बैंक तथा एसियाली विकास बैंक लगानीका लागि अगाडि आएका छन् । नेपालले अधिक कार्बन उत्सर्जन गर्ने नगरेको भए पनि जलवायु परिवर्तनको प्रभावको मार खेपिरहेकाले यी आयोजनाका लागि सहुलियतपूर्ण ऋण उपलब्ध गराउन सरकारले भनेको छ’, उनले भने ।
उनले कोभिड-१९ महामारीको समयदेखि सूचना प्रविधि (आइटी) क्षेत्र पनि फस्टाएर आएको र अहिले नेपालबाट आइटी सेवा निर्यात भइरहेको बताए । आइटी क्षेत्रमा काम गर्नेहरूले विदेशमा पनि आइटी सेन्टर खोल्न आवश्य रहेको माग राखेपछि चालू आर्थिक वर्षको बजेटमार्फत सम्बोधन गरिएको उनले बताए ।
आइटी क्षेत्रको प्रवर्द्धनका लागि सरकार सकारात्मक रहेपनि सिस्टममा अझै कठिनाई रहेकाले त्यसलाई सरकारले सुधार गर्दै लैजाने उनको भनाई छ । उनले अहिलेको पिढीमा नेपालको अवस्थालाई लिएर चरम निराशा भएपनि २०४६ पछिको अवस्थाबाट धेरै अगाडि आइसकेको बताए ।
‘२०४६ सालपछि मुलुकको कूल ग्रर्हास्थ उत्पादन (जिडिपी) मा ६० गुणा वृद्धि भएको । नागरिकको औसत आयु पनि ५४ वर्षबाट बढेर ७२ वर्ष पुगिसकेको छ । प्रतिव्यक्ति आयमा ७ गुणा वृद्धि हुँदा विद्युत पहुँच शून्यबाट ९७ प्रतिशत पुगेको छ । यसलाई ठूलै उपलब्धी मान्नु पर्छ । तर, अझै धेरै गर्न बाँकी छ’, उनले भने ।
अर्थमन्त्री महतले अब राजनितिक अस्थिरताको अन्त्य गरी सबै क्षेत्रमा लगानीको दायरा बढाएर आर्थिक समृद्धिको दिशामा अगाडि बढ्ने समय आएको बताए । मंगलबारबाट सुरु भएको एनआरएनएको ११औं महाधिवेशन नयाँ नेतृत्व चयन गर्दै कात्तिक ३ गत सकिनेछ । महाधिवेशनमा सहभागी हुन विश्वभरमा छरिएर बसेका गैरआवासीय नेपालीहरू काठमाडौंमा भेला भएका छन् ।
