काठमाडौं । नेपाल मध्यस्थता परिषद् (नेप्का) र चाइनास्थित ग्वान्झाओ आर्विट्रेसन कमिशनबीच अन्तर्राष्ट्रिय मध्यस्थताको विषयमा सहकार्य गर्नका लागि चाइनाको ग्वान्झाओमा एक कार्यक्रमबीच आपसी समझदारीपत्रमा हस्ताक्षर भएको छ ।
ग्वान्झाओ आर्विट्रेसन कमिशनद्वारा आयोजना गरिएको कार्यक्रममा नेप्काका अध्यक्ष डा. राजेन्द्रप्रसाद अधिकारी र ग्वान्झाओ आर्विट्रेसन कमिशनका महानिर्देशक छेन सिमिङले समझदारीपत्रमा हस्ताक्षर गरे ।
कार्यक्रममा ग्वान्झाओका लागि नेपालका महावाणिज्यदूत हरिशरण पुडासैनीको पनि सहभागिता रहेको थियो । कार्यक्रममा बोल्दै महावाणिज्य दूत पुडासैनीले नेपाल मध्यस्थता परिषद् र ग्वान्झाओ आर्विट्रेसन कमिशनबीच भएको यो समझदारीपत्रले दुई देशबीचको आपसी सम्बन्धलाई थप मजबुत बनाउन महत्वपूर्ण भूमिका खेल्ने बताए ।
व्यवसायिक प्रकृतिका विवाद समाधानका लागि नेपालले गरेको प्रयास र यसका उपलब्धीहरुलाई विश्वकै आर्थिक केन्द्रको रुपमा विकास भइरहेको ग्वान्झाओ सहरमा रहेको ग्वान्झाओ आर्विट्रेसन कमिशन मार्फत उजागर गर्नु प्रशंसनीय रहेका उनको भनाइ थियो ।
नेप्काको यस कार्यले विदेशका लगानीकर्ताहरुलाई नेपालप्रति आकर्षित गर्न र नेपालमा विदेशी लगाउन भित्र्याउनका निमित्त महत्वपूर्ण भूमिका खेल्नेमा आफू विश्वस्त रहेको पनि बताए ।
ग्वान्झाओ आर्विट्रेसन कमिशनका निर्देशक छेन सिमिङले नेपाल मध्यस्थता परिषद्सँग भएको यो समझदारीले अन्तर्राष्ट्रिय मध्यस्थताको विस्तार र सुदृढीकरणका लागि थप बल पुग्ने बताए । दुई देशबीचको आपसी सम्बन्धलाई मजबुत बनाउन समेत यस कार्यले मद्दत पुर्याउने उनको भनाइ छ ।
सोही कार्यक्रममा बोल्दै नेपाल मध्यस्थता परिषद्का अध्यक्ष डा. राजेन्द्रप्रसाद अधिकारीले अन्तर्राष्ट्रिय मध्यस्थताको निमित्त नेपाल र नेपाल मध्यस्थता परिषद् एक उपयुक्त स्थान हुने र आपसी सहकार्यबाट अन्तर्राष्ट्रिय मध्यस्थताको लागि दुबै संस्थाले मिलेर काम गर्न सक्छ भन्ने धारणा व्यक्त गरे ।
उक्त समझदारीपत्रमा हस्ताक्षर गर्ने कार्यक्रममा नेपाल मध्यस्थता परिषद्का महासचिव अधिवक्ता बाबुराम दाहाल, र सचिव अधिवक्ता थानेश्वर काफ्ले, महावाणिज्य दूताबासका वाणिज्य दूत कुञ्जन शाह र ग्वान्झाओ आर्विट्रेसन कमिशनका दो योङयाङ लगायतको उपस्थिति रहेको थियो ।