नेपाल पूर्वाधार 
काठमाडौं । भारतको पञ्जाव राज्यको विद्युत माग १४ हजार मेगावाट नाघेको छ । कृषि उत्पादनमा अगाडि रहेको पञ्जावमा रोपाईं सुरु भएपछि विद्युतको माग अहिलेसम्मकै उच्च विन्दुमा पुगेको हो ।
धान खेती लगाउने किसानले दैनिक ८ घन्टा पानीका लागि विद्युत मोटर चलाइरहेकाले खपत बढेको भारतीय सञ्चार माध्यमहरूले जनाएका छन् । सोमबारको उच्च माग १४ हजार १ सय ८२ मेगावाट आएको समाचारमा जनाइएको छ ।
विद्युतको उच्च माग व्यवस्थापन गर्न पञ्जाव स्टेस पावर कर्पोरेशन लिमिटेड (पिएसपिसिएल) ले उत्तरतर्फको ग्रिडबाट ८ हजार ५ सय मेगावाट आपूर्ति गरेको थियो । पञ्जावमा पिएसपिसिएल अन्तर्गतको जडित क्षमता ५ हजार ६ सय मेगावाट छ । ८ सय मेगावाट जलविद्युत उत्पादन छ । ३२ सय मेगावाट निजी क्षेत्रले उत्पादन गरेर ग्रिडमा जोडेको छ ।
यो वर्ष गत आइतबार ११ हजार ९ सय ९७ मेगावाट पुगेको माग सोमबार बढेर १४ हजार मेगावाट नाघेको हो ।जुनको अन्तिम सातासम्ममा यो माग बढेर १५ हजार ५ सय मेगावाट पुग्ने प्रक्षेपण गरिएको छ ।
पञ्जावमा गत वर्ष गर्मी मौसमा उच्च माग ११ हजार २५ मेगावाटदेखि ११ हजार ३ सय ४७ मेगावाट थियाे । कोइला अभाव नरहेकाले आपूर्ति व्यवस्थापनमा तत्काललाई समस्या नहुने पिएसपिसिएललाई उदृत गर्दै समाचारमा जनाइएको छ ।
निजी थर्मल प्लान्ट सञ्चालका लागि पनि २६ देखि ४४ दिनसम्मका लागि कोइला सञ्चित रहेको जनाइएको छ । जलविद्युत आयोजनाको जलाशयमा पनि पानीको सतह बढी रहेकाले जलाशय आयोजनाले पूर्ण क्षमतामा विद्युत उत्पादन गरिरहेका छन् ।
भारतकाे ७० प्रतिशत बढी विद्युत काेइलामा आधारित थर्मल प्लान्टबाट उत्पादन हुँदै आएकाे छ । अधिक माग थर्मल प्लान्टकाे विद्युले धानिरहेकाे हुँदा कार्बन उत्सर्जन न्युनिकरण गर्न नवीकरणीय ऊर्जा उत्पादन बढाउनु पर्ने चुनाैती छ ।
