नेपाल पूर्वाधार 
काठमाडौं । राष्ट्रिय प्रसारण ग्रिड कम्पनी लिमिटेड र स्वतन्त्र ऊर्जा उत्पादकहरूको संस्था, नेपाल (इप्पान) ले विद्युत् प्रसारण पूर्वाधारको विकास, नीतिगत सुधार तथा प्राविधिक अध्ययन–अनुसन्धानमा सहकार्य गर्ने सहमति गरेका छन् ।
सोमबार ग्रीड कम्पनीको बुद्धनगरस्थित कार्यालयमा यस्तो सहमति भएको हो । दुवै संस्थाका पदाधिकारीहरूले नेपालको प्रसारण प्रणालीलाई थप प्रभावकारी, व्यवस्थित र दिगो बनाउन संयुक्त रूपमा काम गर्ने प्रतिबद्धता व्यक्त गरेका छन् ।
कार्यक्रममा ग्रीड कम्पनीका प्रमुख कार्यकारी अधिकृत (सीईओ) सागर श्रेष्ठले प्रसारण पूर्वाधार विस्तारमा निजी क्षेत्रको सहभागिता आवश्यक रहेको उल्लेख गर्दै सरकारी निकाय र निजी क्षेत्रबीचको सहकार्यलाई अझ प्रभावकारी बनाउने समय आएको बताए । कम्पनीको स्थायी आम्दानीको स्रोत सुनिश्चित गर्न प्रसारण शुल्क (ह्वीलिङ चार्ज) निर्धारणलगायतका नीतिगत विषयमा सरकारसँग समन्वय भइरहेको जानकारी उनले दिए ।
नदी कोरिडोरमा प्रसारण लाइन निर्माण गर्दा एकीकृत अवधारणा अपनाउनुपर्नेमा दुवै पक्ष सहमत छन् । एउटै क्षेत्रमा छुट्टाछुट्टै संरचना निर्माण गर्नुको सट्टा साझा पूर्वाधार विकास गर्दा लागत र समय दुवै बचत हुने बुझाइ छ ।
कम्पनीका प्रवक्ता नगेन्द्रप्रसाद चौधरीले ग्रीड कम्पनीले गरिरहेका कामको जानकारी दिएका थिए । कम्पनीले नेपालको प्रसारण प्रणालीको मास्टर प्लान बनाएर काम गरिरहेको छ । ठूला ठूला प्रसारणलाइनहरु निर्माण थालेको छ । ग्रीड कम्पनीले नेपालमा भरपर्दो प्रसारण प्रणालीको विकासका लागि काम गरिरहेको छ । सरकारले सबै प्रसारण प्रणालीको विकासको जिम्मा दिने उदेश्यका साथ कम्पनी स्थापना गरेको हो ।
इप्पानका अध्यक्ष मोहनकुमार डाँगीले प्रसारण पूर्वाधार विकासमा आरपिजिसिएलसँग सहकार्य सुरु हुनु निजी ऊर्जा उत्पादकका लागि सकारात्मक अवसर भएको बताए । उनले निजी क्षेत्रले प्रसारण प्रणालीका चुनौती समाधानका लागि विगतदेखि सरकारसँग निरन्तर सहकार्य गर्दै आएको उल्लेख गर्दै आगामी दिनमा आरपिजिसिएलसँगको सहकार्यलाई अझ सुदृढ बनाउने आवश्यकता औँल्याए ।
भविष्यमा प्रसारण प्रणालीको व्यवस्थापन क्रमशः आरपिजिसिएलमार्फत सञ्चालन गर्ने र उत्पादन तथा प्रसारण व्यवस्थापनलाई थप प्रभावकारी बनाउन भार प्रेषण केन्द्र (एलडीसी) को व्यवस्थापनसमेत सोही संरचनामा आबद्ध गर्न सकिने विषयमा उनले सुझाव दिए।
