नेपाल पूर्वाधार 
काठमाडाैं। दक्षिण पर्वतको पैंयुँ र विहादी गाउँपालिकामा बनेकाे ३.५ मेगावाटकाे सेतीखाेला जलविद्युत् आयोजनाकाे विद्युत राष्ट्रिय प्रसारण प्रणालीमा जाेडिएकाे छ । पर्वत पैयुँखोला हाइड्रोपावर कम्पनीले निर्माण सम्पन्न गरेको आयोजनाबाट परीक्षण उत्पादन सुरु गरी विद्युत प्रसारण प्रणालीमा जाेडिएकाे हाे ।
आयोजनाले उत्पादन गरेकाे विद्युत ३३ केभी घाङग्रे–लुंखु प्रसारण लाइन मार्फत प्रणालीमा जाेडिएकाे छ । आयोजनाबाट गत साेमबारदेखि नै परीक्षण उत्पादन सुरु गरेकाे प्रवर्द्धक कम्पनीका अध्यक्ष राजकुमार बस्यालले जानकारी दिए । उनका अनुसार उत्पादन सुरु भएकाे अवधिबाट २ सातासम्म परीक्षण गरेपछि आयोजनाले व्यापारिक उत्पादन सुरु गर्नेछ ।
२०७५ सालदेखि निर्माण सुरु भएको आयोजना ५ वर्षमा सकिएको हो । आयोजनाको मुहान पैंयुँ गाउँपालिका वडा नं-२ वेउलीवासको छचन्नेमा रहेको छ । विद्युतगृह विहादी गाउँपालिका–६ शालिग्रामको घाङ्ग्रेमा निर्माण गरिएकाे छ । छचन्नेदेखि ३ हजार ६ सय मिटर लामो पाइपलाइनमार्फत घाङ्ग्रेमा रहेको विद्युतगृहमा पानी खसालिएको छ ।
आयोजनाको इलेक्ट्रोमेकानिकल काम चाइनाको एशियन प्यासिफक प्रोजेक्ट कम्पनीले गरेको हाे । पाइपलाइनको काम के एण्ड के विल्डर्स विराटनगरले गरेको हो । आयोजनको सिभिलतर्फको निर्माण कार्य द ब्रदर्श विल्डर्स काठमाडौँले गरेको पर्वत पैंयुँखोला हाइड्रोपावर कम्पनीका सचिव डा. शिवशंकर बस्यालले जानकारी दिए ।
विद्युत विकास विभागबाट २०७४ सालमा उत्पादन अनुमतिपत्र लिइ निर्माण थालिएकाे आयोजनाबाट २ वर्षभित्र विद्युत उत्पादन सुरु गर्ने पहिलाे तालिका थियाे । तर, काेभिड-१९ महामारी, बाढीपहिराेले पुर्याएकाे क्षति लगायत कारणले २ वर्षकाे समय थप भयाे ।याे अवधिमा पनि आयोजना नसकिएपछि अर्काे एक वर्ष थप गरी सम्पन्न गरिएकाे कम्पनी सचिव बस्यालले बताए ।
आयोजना निर्माणका लागि सिद्धार्थ बैंक लिमिटेड र गरिमा विकास बैंकले ऋण लगानी गरेका छन् । हालसम्म आयोजना निर्माणका लागि एक अर्ब १० करोड रुपैयाँ खर्च भइसकेको पनि बस्यालले बताए ।
आयोजनाले परीक्षण अवधिभर महाशिला गाउँपालिकाको वडा नं १, ३ र ५ तथा पैँयु गाउँपालिकाका वडा नं १ र ३ एवं विहादी गाउँपालिकाको वडा नं ६ मा रहेको प्रसारण लाइन, खम्बा आदि नछुन, टाढा हुन र सावधानी रहन अनुरोध गरेको छ ।
