नेपाल पूर्वाधार 
काठमाडौं । रेलवे योजना र निर्माण प्रविधिको विकासबारे चिनीया अनुभव साट्ने उद्देश्यका साथ काठमाडौंमा अन्तर्राष्ट्रिय कार्यशाला शुरु भएको छ । चीनले रेलमार्ग निर्माण तथा यसको अत्याधुनिक प्रविधिमा गरेको विकासबारे नेपालमा रहेका सरोकारवालालाई सिकाउने र बुझाउने लक्ष्यको साथ तालिमको आयोजना गरिएको हो । तालिममा नेपाल रेल विभाग, निर्माण कम्पनी, परामर्शदाता कम्पनी, सिभिल इञ्जिनियरिङ, मेकानिकल इञ्जिनियरिङ, ऊर्जा तथा जलस्रोतलगायतका संस्थाका प्रतिनिधी तथा इञ्जिनियर र सरोकारवालाको सहभागिता रहेको छ ।
चिनियाँ विज्ञान तथा प्रविधि मन्त्रालयको सहयोगमा चाइना रेलवे अरिवन इञ्जिनियरिङ ग्रुप कम्पनीले आयोजना गरेको हो । यो चीनको रेलवे डिजाइन तथा निर्माणमा अग्रणीमध्यको एक कम्पनीमा पर्छ । तालिममा २४ जनाको सहभागिता रहेको छन् । तालिमको माध्यमबाट चीनीया रेलवे विकासको अवधारणा, प्राविधिक मापदण्ड, सफलताहरु साझा गर्नको लागि सहयोगी भएको कम्पनीकी उपमहाप्रबन्धक तान मेङले बताइन् । साउन ३ गतेदेखि (जुलाई १९) शुरु भएको तालिम १७ साउन (अगष्ट २) सम्म सञ्चालन हुनेछ ।
‘यसले अद्यावधिक प्रविधिलाई फैलाउन, व्यवस्थापकीय अनुभव साझा गर्न तथा व्यवसायिक दक्ष जनशक्तिलाई प्रवद्र्धन गर्न सहयोग पु्ग्छ’ उनले भनिन् । रेलवेको विकासमार्फत समुन्नति हासिल गर्न र राष्ट्रिय आर्थिक विकासमा सहयोग पुर्याउन महत्वपूर्ण हुने उनको भनाइ छ ।
कार्याशालामा सहभागी रेल विभागका सिनियर डिभिजनल इञ्जिनियर अमन चित्रकारले तालिमबाट सरकारी क्षेत्रमा मात्र सिमित नभइ रेलबारे निजी क्षेत्रलाई पनि जानकार बनाउन प्रभावकारी हुने बताए । ‘रेलमार्गमा आवश्यक पर्ने आधारभूतदेखि सुरुङ, पुल, सब ग्रेड, रोलिङ स्टोनलागतका क्षेत्रको बारेमा पनि जानकारी दिइनेछ’ उनले भने । त्यसबाहेक चीनमा रेलवे विकासको थालनीदेखि अहिलेको उच्च गतिको रेलवे विकाससम्मका अनुभवलाई साझा गर्ने मञ्चको रुपमा तालिम प्रभावकारी हुनेछ ।
चिनीया अधिकारीका अनुसार नेपाल रेलवे विकासमा शुरुवाती चरणमै रहेको, प्रशस्त जनशक्ति विकास नभइसकेको र अनुभवको कमी रहेको अवस्थामा चिनीया अनुभवबाट धेरै सिक्न सक्नेछ । यसले रेलवेको योजना निर्माणदेखि प्रविधि प्रयोगको विषयमा समेत अनुभव साटिनेछ ।
