नेपाल पूर्वाधार 
काठमाडाैं । भारतीय प्रधानमन्त्री नरेन्द्र मोदी सोमबार विहान लुम्बिनी भ्रमणमा आउदैछन् । गौतम वुद्धको जन्म, ज्ञान र महापरिनिर्माण प्राप्त गरेको वुद्ध पूर्णिमाको दिनमा उनको भ्रमण हुन लागेको हो ।
प्रधानमन्त्री मोदीले धेरै पहिलेदेखि लुम्बिनी भ्रमण गर्ने चाहाना व्यक्त गरे पनि जुरेको थिएन् । तर, पछिल्ला केही महिनादेखि दुवै देशका कुटनीतिक तहमा भएको तयारीपछि यो भ्रमण निश्चित गरिएको हो ।
परराष्ट्र मन्त्रालयले जारी गरेको विज्ञप्तिअनुसार बुद्ध जयन्तीको दिन लुम्बिनीमा हुने विशेष समारोहमा प्रधानमन्त्री शेरबहादुर देउवासँगै मोदी सहभागी हुनेछन् । त्यस्तै, मायादेवी मन्दिरमा हुने प्राथनामा दुवै देशका प्रधानमन्त्री सहभागी हुनेछन् । लुम्बिनीको मोनास्टिक जोनमा बौद्ध संस्कृति र सम्पदा केन्द्रको शिलान्यास गर्नेछन् । त्यस्तै, बुद्ध जयन्तीको अवसरमा आयोजित कार्यक्रमलाई सम्बोधन गर्नेछन ।
लुम्बिनी भ्रमणमा दुवै देशका प्रधानमन्त्रीबीच आपसी सहयोग र चासोको विषयमा दुईपक्षिय भेटवार्ता हुनेछ । त्यसपछि भारतीय प्रधानमन्त्री मोदी र भ्रमण टोलीको सम्मानमा प्रधानमन्त्री देउवाले आयोजना गर्ने दिवाभोजमा सरिक हुनेछन । यो प्रधानमन्त्री मोदीको पाँचौ नेपाल भ्रमण हो ।
भारतीय प्रधानमन्त्रीको रुपमा लुम्बिनी भ्रमण गर्ने मोदी पहिलो हुन् । यसअघि कुनै पनि भारतीय प्रधानमन्त्रीले लुम्बिनी भ्रमण गरेका छैनन् । प्रधानमन्त्री मोदीको लुम्बिनी भ्रमणपछि गौतमबुद्धको जन्मस्थानको बारेमा उठ्ने गरेको भ्रमलाई स्पष्ट हुने नेपाली अधिकारीहरुको भनाइ छ ।
यसको साथै सोमबारदेखि औपचारिक उडान थालनी गरिने गौतमवुद्ध अन्तर्राष्ट्रिय विमानस्थलको प्रवद्र्धनमा पनि भ्रमणले सहयोग पुग्नेछ । यस विमानस्थलको नियमित उडानपछि अन्तर्राष्ट्रिय वौद्धमार्गी र लुम्बिनी भ्रमण गर्न चाहानेहरु सिधै लुम्बिनी पुग्ने बाटो खुलेको छ ।
