नेपाल पूर्वाधार 
म्याग्दी । म्याग्दीको बेनी नगरपालिका–४ सिंगामा चिस्यान गृह बनाइएको छ । कृषिउपज सङ्कलन, भण्डारण र व्यवस्थापनका लागि बेनी नगरपालिकाले शीतभण्डार निर्माण गरेको हो । सिंगामा तीन सय मेट्रिक टन क्षमताको शीतभण्डार बनाउन गत आर्थिक वर्षमा एक करोड ९० लाख रुपैयाँ विनियोजन गरिएको थियो । राजेशबाबु निर्माण सेवाले एक करोड ५१ लख २० हजार सात सय ३८ रुपैयाँमा निर्माण गर्ने गरी २०७९ फागुन तेस्रो साता ठेक्का सम्झौता गरेको थियो । गत असारमा यसका लागि तीन महिना म्याद थपिएको थियो ।
बेनी नगरपालिका–४ का वडाध्यक्ष अणबहादुुर खड्काले चिस्यान गृह निर्माण र उपकरण जडानको काम सकिएको जानकारी दिएका छन् । “चिस्यान गृहको पूर्वाधार निर्माण र उपकरण जडान गरेर परीक्षण थालिएको छ”, उनले भने, “परीक्षण सफल र हस्तान्तरण भएपछि चिस्यान गृह सञ्चालन गर्ने तयारी गरेका छौँ ।” सो चिस्यान गृहको क्षमता तीन सय मेट्रिक टन रहेको छ । नगरपालिका र म्याग्दीका अन्य पालिकामा उत्पादन हुने कृषिजन्य उत्पादनको उचित व्यवस्थापनमा कोल्ड स्टोर सहयोगी बन्ने अपेक्षा गरिएको छ ।
तीन वर्षअघि बेनी नगरपालिकालाई चिस्यान गृह बनाउन सङ्घीय सरकारबाट बजेट विनियोजन भए पनि स्थान छनोट हुन नसकेपछि कार्यान्वयन हुन सकेको थिएन । चिस्यान गृह बनेपछि सुन्तला, आलुलगायत कृषि उपज भण्डारण गरेर बेमौसममा बजारमा आपूर्ति गराउन र बढी मूल्य पाउन सकिने कृषकको अपेक्षा छ । यसैगरी रघुगङ्गा गाउँपालिका–५ झिँमा २० मेट्रिक टन र वडा नम्बर २स्थित भगवतीमा २५ मेट्रिक टन क्षमताको चिस्यान गृह निर्माण भएको छ । झिँमा २१ लाख ७८ हजार रुपैयाँ लागतमा चिस्यान गृह निर्माण भएको गाउँपालिकाका इन्जिनियर सुदीप गौतमले बताए ।
भगवतीको चिस्यान गृह बनाउन डोलेश्वर महादेव कन्ट्रक्सन एण्ड सप्लायर्सले करबाहेक ७९ लाख ७० हजार ८४ रुपैयाँमा ठेक्का सम्झौता गरेको थियो । दुुई वटै चिस्यान गृह प्रयोगमा भने आएका छैनन् । प्रधानमन्त्री कृषि आधुनिकीकरण परियोजनाको सहयोगमा बेनी नगरपालिका–९ बियाडामा पाँच हजार किलोग्राम क्षमताको चिस्यान गृह निर्माण भएको छ । यसअघि गत वर्ष अन्नपूर्ण गाउँपालिकाको नारच्याङमा २० हजार किलोग्राम क्षमताको चिस्यानगृह निर्माण भएको थियो ।
