नेपाल पूर्वाधार 
काठमाडौं । भारतले मध्यकालिन विद्युत व्यापार सम्झौता (पिटिए) अन्तर्गत २ जलविद्युत आयोजनाको ११० मेगावाट विद्युत खरिद गर्न स्वीकृति प्रदान गरेको छ । भारतले पहिलो पटक मध्यकालिन सम्झौता अन्तर्गत ५ वर्षका लागि विद्युत खरिद गर्ने नेपालको प्रस्ताव स्वीकृत गरेको हो ।
भारतले मध्यकालिन सम्झौता अन्तर्गत ४०० केभी ढल्केबर–मुजफ्फरपुर अन्तरदेशीय प्रसारण लाइनमार्फत ११० मेगावाट विद्युत लैजाने स्वीकृति दिएको नेपाल विद्युत प्राधिकरणको प्रवक्ता सुरेशबहादुर भट्टराईले जानकारी दिए । उनका अनुसार यो स्वीकृति ५ वर्षका लागि हुनेछ ।
भारतले निजी लगानीको ८६ मेगावाटको सोलू दूधकोसीको ८३.४२ मेगावाट र २७ मेगावाटको दोर्दी खोलाको विद्युत मध्यकालका लागि खरिद गर्ने सहमति दिएको प्राधिकरण विद्युत व्यापार विभाग प्रमुख प्रबल अधिकारीले बताए । ‘हामीले २ सय मेगावाटका जलविद्युत आयोजनाको विद्युत मध्यकालिन सम्झौता अन्तर्गत खरिदको प्रस्ताव भारत समक्ष गरेका थियौं,’ उनले भने, ‘तत्कालका लागि ११० मेगावाटको स्वीकृति मिलेको छ ।’
उनले अहिलेलाई ११० मेगावाटको स्वीकृति मिल्नु नै राम्रो सुरुवात भएको बताए । उनका मध्यकालिन सम्झौता अनुसार भारतले यी दुई आयोजनाको विद्युत प्रतियुनिट ५.२५ भारतीय रुपैयाँमा खरिद गर्नेछ ।
उनले महेन्द्रनगर–टनकपुर १३२ केभी प्रसारण लाइनमार्फत ७० मेगावाट विद्युत खरिद गर्ने नेपालको प्रस्ताव पनि भारतले स्वीकृत गरेको जानकारी दिए । यो विन्दुबाट निर्यात हुने ७० मेगावाट विद्युत भारतको डे अहेड मार्केटमा बिक्री हुनेछ । प्राधिकरणले अहिले डे अहेड मार्केटमा ४५२ मेगावाट विद्युत निर्यात भएकोमा अब यो परिमाण ५२२ मेगावाट पुगेको छ ।
नेपाल र भारतबीच गत जेठमा मध्यकालिन विद्युत व्यापार सम्झौता (पिटिए) मार्फत २ सय मेगावाट विद्युत बिक्री गर्ने सम्झौता भएको थियो । विद्युत प्राधिकरणका कार्यकारी निर्देशक कुलमान घिसिङ र एनभीभीएनका प्रमुख कार्यकारी अधिकृत एके विश्वबीच हालै मध्यकालीन रुपमा विद्युत व्यापारका लागि सम्झौतामा हस्ताक्षर भएको थियो ।
नेपालले सोलु दूधकोसी र दोर्दी खोला सहित मिस्ट्रीखोलाको ४०.७४ मेगावाट, माथिल्लो बलेफी ‘ए’ को ३४.९२ मेगावाट, लिखुखोला–१ को २८.१७ मेगावाट र माथिल्लो चाकुको १२.७५ मेगावाट विद्युत मध्यकालिन विद्युत व्यापारका लागि प्रस्ताव गरेको थियो । सोलू दूधकोसी र दोर्दी खोलाबाहेकका आयोजनाको मध्यकालिन विद्युत व्यापार अन्तर्गत खरिद गर्न भारतले स्वीकृत गरेको छैन ।
