नेपाल पूर्वाधार काठमाडौं । जलविद्युतका लगानीकर्ता एवं जलविद्युत आयोजनाको वातावरण अध्ययन सम्बन्धि परामर्शकाे काम गर्दै आएका शंकर बस्यालले स्वतन्त्र ऊर्जा उत्पादकहरूको संस्था, नेपाल (इपान) को नयाँ कार्यसमितिमा रहने अवसर पाए वन र वातावरणसँग सम्बन्धित मुद्दा उठाउने प्रतिबद्धता जनाएका छन् ।
इपानकाे नयाँ कार्यसमिति चयनका लागि बिहीबार हुने निर्वाचनमा सदस्य पदमा उमेद्वारी दिएका उनले जलविद्युत आयाेजनामा आउने वन र वातावरणसँग सम्बन्धित समस्या समाधानका लागि सम्बन्धित निकाय समक्ष पुर्याउन भूमिका खेल्ने प्रतिबद्धता जनाएका हुन् ।
जलविद्युत आयोजना निर्माणको वन तथा वातावरण सम्बन्धि कानूनी प्रक्रियालाई छिटो छरितो बनाउन इपानमा बसेर काम गर्ने पनि उनको घोषणा छ । उनले गणेश कार्की प्यानलबाट सदस्य पदमा उमेद्वारी घाेषणा गरेका छन् । सदस्य पदका लागि कडा प्रतिश्पर्धा हुने देखिए पनि विजयी हुने सम्भावना बलियाे भएकाे उनकाे दाबी छ ।
गणेश कार्की प्यानल अनुभवी, शशक्त र इपानको आवश्यकता भएकाले आफुले पनि यही प्लानलबाट उमेद्वारी दिएको बश्यालकाे भनाइ छ । उनले आफु सदस्य पदमा निर्वाचित भएमा इपान सम्पूर्ण ऊर्जा उद्यमीको साझा संस्था भएको प्रत्याभूति हुने गरी नयाँ कार्यसमितिमा बसेर काम गर्ने समेत बताए ।
साढे २ दशक बढी समयदेखि जलविद्युत क्षेत्रको वन तथा वातावरण अध्ययन सम्बन्धि परामर्शकाे काम गर्दै आएका र जलविद्युतमा लगानी समेत गरेका उनले इपानको नयाँ कार्यसमितिमा सदस्य पदको जिम्मेवारी पाएमा देशको विद्युत खपत बढाउन सरकारको ध्यान केन्द्रित हुने गरी विभिन्न योजना बनाउन पहल गर्ने प्रतिबद्धता पनि जनाएका छन् ।
उनले गुणस्तरीय विद्युत आपूर्तिका लागि पहल गर्ने, देशभरमा उच्च क्षमताका प्रसारण तथा वितरण लाइनको निर्माण गर्न सम्बन्धित निकाय समक्ष पहल गर्न भूमिका खेल्ने प्रतिबद्धता जनाएका छन् ।
आन्तरिक विद्युत व्यापार बढाउने, भारत र बंगलादेशसँगको अन्तरदेशीय विद्युत व्यापार बढाउन उच्च स्तरीय आयोग बनाएर रणनीतिकरूपमा विद्युत बजार विस्तार गर्न पहल गर्ने उनको योजना छ ।
