नेपाल पूर्वाधार 
काठमाडाैं । राजमार्गहरू छेउमा राखिएका मदिरा, चुरोट सुर्तीजन्य पदार्थका विज्ञापन १५ दिनभित्र हटाउन भाैतिक पूर्वाधार तथा यातायात मन्त्रालयले सूचना जारी गरेकाे छ । साथै सडक सीमाबाहिर अन्य जग्गामा रहेका विज्ञापनहरु समेत स्थानीय प्रशासनकाे समन्वय र सहयाेगमा तत्कालै हटाउने व्यवस्था मिलाउन मन्त्रालयले सूचित गरेकाे छ ।
होर्डिंग बोर्ड हटाउने सम्बन्धमा २९ माघमा सचिवस्तरीय निर्णय भएकाे हाे । मन्त्रालयले राजमार्गहरूको छेउमा राखिएका मदिराजन्य विज्ञानपनका कारणले चालकलाई विकेन्द्रित गर्ने र त्यसकै कारण सडक दुर्घटना बढ्न सक्ने उल्लेख गरेकाे छ ।
नेपाल जनस्वास्थ्य ऐन, २०७४ को दफा ४५ को उपदफा १ मा मदिरा, चुरोट सुर्तीजन्य पदार्थ लगायतका मानव स्वास्थ्यलाई प्रतिकूल असर गर्ने कुनै पनि विज्ञापन सामाग्री मै उत्पादन, वितरण तथा प्रचारप्रसार गर्न पाइने छैन भन्ने कानूनी व्यवस्था रहेको छ । तर मदिराको हकमा व्यवस्थाकाे प्रभावकारी कार्यान्वयन भएको छैन् ।
राष्ट्रिय स्वस्थ्य शिक्षा, सूचना तथा संचार केन्द्रले कुनै पनि माध्यम जस्तै होर्डिङ बोर्ड, पोस्टर, पत्र पत्रिका, अनलाइन मिडिया, सोसल मिडिया आदिमा हुने विज्ञापन / प्रचारप्रसार प्रवर्धन तथा प्रयोजन बन्द गर्नको लागि प्रदेश सरकार, स्थानीय सरकार तथा अन्य सम्बन्धित निकायमा पत्राचार गरिदिन गरेकाे छ ।
यस्तै, उपभोक्ता हित संरक्षण मञ्चले सचिवलाइ संवोधन गरी सडक सीमा भित्र रहेका मदिराजन्य विज्ञापनका सामाग्रीहरु हटाइदिन अनुरोध गरेकाे थियाे ।
त्यसैगरी सार्वजनिक सडक ऐन, २०३१ को दफा १८ मा सार्वजनिक सडकको आवागमनमा बाधा पुर्याउने माल वस्तु हटाउने अधिकार सडक विभागलाई रहेको छ ।
