नेपाल पूर्वाधार 
काठमाडौं । नेपाली सेनाले गोरखा जिल्लास्थित निर्माणाधीन बेनिघाट (आरुघाट–लार्केभञ्ज्यांङ) सडक आयोजना अन्तर्गत धार्चे गाउँपालिका वडा नं ७ हावाडाँडादेखि सोही गाउँपालिका वडा नं ३ स्थित दोभानसम्मको १८ किलोमिटर सडक सडक विभागलाई हस्तान्तरण गरेको छ ।
यस सडक खण्डको ट्रयाक निर्माण कार्य सम्पन्न गरी सोमबार सडक विभाग अन्तर्गत ११ किलो छेपेटार–भालुस्वाँरा–वारपाक सडक योजना, गोरखाका प्रमुख सिनियर डिभिजनल इञ्जिनियर पशुपति ज्ञवालीलाई हस्तान्तरण गरेको हो । नेपाली सेनाका बेनिघाट–आरुघाट–लार्केभञ्ज्यांङ सडक निर्माण कार्यदलका प्रमुख प्राविधिक सेनानी विनोद भट्टले हस्तान्तरण गरे ।
मंसिर २६, २०७३ मा मन्त्रिपरिषद्को निर्णयबाट भौगोलिक विकटता, मौसमी प्रतिकुलता, कडा चट्टानयुक्त भू–बनोट आदिका कारण उक्त सडक खण्डको ट्रयाक खोल्ने कार्यको जिम्मेवारी सेनालाई दिइएको थियो । जिम्मेवारी दिएअनुसार नै ११ बैशाख २०७४ देखि सेनाले ट्रयाक खोल्ने कार्य शुरु गरेको थियो ।
सडक खण्डको निर्माण पश्चात गोरखा जिल्लाको विकट उत्तरी हिमाली क्षेत्रमा पर्ने धार्चे गाउँपालिका तथा चुनमुब्री गाउँपालिकालाई राष्ट्रिय सडक सञ्जालमा जोड्नेछ ।
यसको साथै सो सडकले जिल्लाको उत्तरी क्षेत्रको विकासमा महत्वपूर्ण योगदान पुग्नेछ ।
