नेपाल पूर्वाधार 
काठमाडाैं । पछिल्लो पटक थपिएको अवधि ६ महिना बाँकी हुँदा पुष्पलाल (मध्यपहाडी) राजमार्गमा अझै ४४ पुल निर्माण गर्न बाँकी छ । राष्ट्रिय गौरवको आयोजनामा निर्माणस्थल उपलब्ध नहुँदा सडकसँगै पुल निर्माणसमेत ढिलाइ भएको छ ।
मध्यपहाडका २६ जिल्ला जोड्ने आयोजनामा जम्मा १३७ पुल निर्माण गर्नुपर्नेमा हालसम्म ९३ पुल सम्पन्न भएको पुष्पलाल (मध्यपहाडी) राजमार्ग आयोजना निर्देशनालयले जनाएको छ । बाँकी रहेका ४४ पुलमध्ये २५ निर्माणाधीन छन् ।
केही पुल सम्पन्न हुने अवस्थामा पुग्न लागेको आयोजनाका सूचना अधिकारी सुरज अधिकारीले जानकारी दिए। ‘यो आवमा १८ पुल निर्माण गरिसक्ने लक्ष्य छ’ उनले भने । त्यस्तै १९ पुलको ठेक्का लगानउ बाँकी छ । यी पुलकाे चालू आवमा नै ठेक्का आह्वान गरेर निर्माणमा जाने तयारी रहेकाे अधिकारीले जानकारी दिए ।
ठूला पुल बन्न लामो समय लाग्ने भए पनि अहिले सो राजमार्गमा निर्माणमा जानुपर्ने ठूला सडक नभएको र बाँकीमा पनि लामो पुल नभएकाले काम गर्नसक्ने निर्माण कम्पनी आएमा चाडै निर्माणा सम्पन्न हुनेछ । ‘साना २०/२५ मिटर लामा पुल भएकाले एकै याममा सकिन्छ’ उनले भने ।
निर्माण व्यवसायीले काम सरासर नगर्दा मात्रै लामो समय लाग्ने हुन्छ । थपिएको अवधि असार मसान्तसम्म भने सडक र पुल दुवैका लागि पर्याप्त नभएको र अझै पनि कतिपय सडक खण्डमा रेखाङ्कन टुङ्गो लगाउन बाँकी रहेकाे छ ।
भेरी पुलमा ठेक्का तोडिएकाले नयाँमा जाँदा समय लाग्ने भएको छ । मध्यपहाडको समृद्धिका आधारका रुपमा रहेको यस राजमार्गको निर्माण सुरु भएको डेढ दशकमा ६४ प्रतिशत काम सकिएको छ ।
आयोजनाको तोकिएको अवधि सकिएको ६ वर्ष नाँघिसक्दा पनि कतिपय खण्डमा सडक कहाँबाट बनाउने (रेखाङ्कन) गर्नेमै अन्योल रहेको छ । पहिले बूढीगण्डकी नदीको नजिकै सडकको रेखाङ्कन गरिएको थियो । ऊर्जा तथा जलस्रोत मन्त्रालयले सो स्थानमा जलाशययुक्त आयोजना निर्माण गर्ने योजना बनाएका कारण अझै अन्योल भएकोसूचना अधिकारी सुरजले बताए ।
केही समय पहिलेसम्म कास्कीमा पनि रेखाङ्कन गर्न अन्योल भए पनि अहिले समाधान भइसकेको उनकाे भनाइ छ । चालू आवमा मात्रै ३५७ किमी सडक कालोपत्र, १८ पुल निर्माण र एक सय ३४ दशमलव पाँच किमी सडक निर्माणका लागि ठेक्का गर्नुपर्ने आयोजनाले जनाएको छ ।
पछिल्लो पटक थप भएको अवधि चालू आवको अन्तिमसम्म भए पनि त्यो अवधिसम्म ठेक्का भइसक्नसमेत कठिन देखिएको छ तर धेरै खण्डमा ठेक्का लगाउन बाँकी नभएको आयोजनाले जनाएको छ ।
पूर्वको पाँचथरको चियोभञ्ज्याङदेखि पश्चिममा बैतडीको झुलाघाटसम्मको यो मार्ग निर्माण भए मध्यपहाडका नागरिकको जीवन सहज हुने, नयाँ सहर निर्माण हुने र पूर्वपश्चिम राजमार्गको चाप कम हुने अनुमान गरिएको छ । सरकारले आव २०६९/७० देखि यो आयोजनालाई राष्ट्रिय गौरवको आयोजनामा राखेको थियाे । रासस
