नेपाल पूर्वाधार 
काठमाडौं। नेपाल टेलिकमले बाढी प्रभावित रसुवा, नुवाकोट र धादिङलगायत जिल्लामा मोबाइल तथा दूरसञ्चार सेवा पुनः सञ्चालनलाई तीव्रता दिएको छ।
कम्पनीका अनुसार भदौ ११ गते हेलिकोप्टरमार्फत कर्मचारी परिचालन गरी रसुवाको गोसाइँकुण्ड गाउँपालिका-६ स्थित सदरमुकाम धुन्चेमा मोबाइल स्टेशन सञ्चालनमा ल्याइएको थियो।
भदौ १२ गतेदेखि नेपाल टेलिकमका प्राविधिकहरू रसुवा, नुवाकोट र धादिङका बाढी प्रभावित क्षेत्रमा सेवा सञ्चालन हुन बाँकी स्थानमा सेवा पुनःस्थापना तथा सञ्चालनमा आएका टावरलाई थप भरपर्दो बनाउन कार्यक्षेत्रमा खटिएका छन्।
रसुवाको गोसाइँकुण्ड गाउँपालिका-५ स्थित गोलजुङ टावर सञ्चालनमा आएपछि स्याफ्रुबेसी, पार्वतीकुण्ड गाउँपालिकाका वडा नं. ४ र ५, गोसाइँकुण्ड गाउँपालिकाका वडा नं. ३ र ५ तथा स्याफ्रुबेसी-टिमुरे राजमार्गका केही भागमा सेवा सुचारु भएको छ।
त्यस्तै, नुवाकोटको सूर्यगढी गाउँपालिका-३ स्थित गेर्खु मोबाइल टावर सञ्चालनमा आएपछि विदुर नगरपालिका-१० र ११ तथा सूर्यगढी गाउँपालिका-४ का केही क्षेत्रमा दूरसञ्चार सेवा सुचारु भएको टेलिकमले जनाएको छ।
विदुर नगरपालिका-८ स्थित तुप्चे टावर तथा गोसाइँकुण्ड गाउँपालिका-२, टिमुरेमाथिको डाँडामा रहेको टेलिकम टावरमा हेलिकोप्टरमार्फत जेनेरेटर, पेट्रोल र प्राविधिक कर्मचारी पुर्याएर सेवा सुचारु गर्ने काम भइरहेको छ।
नेपाल टेलिकमका प्राविधिक कर्मचारीहरू न्यौपानेचौर, राम्चे, गोल्जुङ र धुन्चे स्टेशनमा निरन्तर खटिएर बाढी प्रभावित क्षेत्रमा सेवा सञ्चालन गरिरहेका छन्।
रसुवा, नुवाकोट र धादिङका बाढी प्रभावित १२० साइटमध्ये हालसम्म ८० साइटमा सेवा सुचारु भइसकेको नेपाल टेलिकमले जनाएको छ।
विपद्को अवस्थामा नागरिकको सञ्चार आवश्यकतालाई सहज बनाउन सेवा निरन्तरता, पूर्वसूचना तथा सचेतना र आवश्यक प्राविधिक कार्यलाई उच्च प्राथमिकतामा राखिएको टेलिकमले जनाएको छ।
