नेपाल पूर्वाधार 
काठमाडौं । इरानले कतारस्थित अमेरिकी सैन्य बेसमा हमला गरेको छ ।
गत साता अमेरिकाले इरानका परमाणु केन्द्रहरुमा गरेको हमलाको जवाफका रुपमा इरानले कतारस्थित अमेरिकी एयरबेसमा हमला गरेको हो ।
सामाजिक सञ्जालमा देखिएका भिडियोहरुमा कतारको राजधानी दोहाको आकाशमा बमबारी भइरहेको र त्यहाँको प्रतिरक्षा प्रणालीले मिसायलहरुलाई रोक्न खोजिरहेको देखिन्छ । इरानले प्रहार गरेका मिसायलहरुले कतारमा रहेको अमेरिकी मध्यपुर्वको सैन्य बेसलाई निशाना बनाएको छ । अल-उदैदस्थित एयरबेसमा गरिएको यो हमलाले मध्यपूर्वमा बढ्दै गएको तनाव झन लम्बिने देखिएको छ ।
इरानले गरेको आक्रमणलाई सुरुवातमा इरानी सरकारी सञ्चारमाध्यम र पछि त्यहाँको सेनाले पनि आक्रमणलाई प्रमाणित गरेको छ ।
अल-उदैदस्थित अमेरिकी सैन्य बेस मध्यपुर्वका लागि अमेरिकाले गर्ने हवाई क्रियाकलाप हेडक्वाटरका रुपमा रहेको छ । कतिपय बेलायती सैनिकहरुले पनि यहाँ समय समयमा आएर काम गर्ने गरेका छन् ।
अमेरिकाले सोमबार इरानले गरेको आक्रमणको नजिकबाट विश्लेषण गर्ने र आफ्ना नागरिकहरुलाई सुरक्षित हुन पनि भनेको छ । साथै, इरानले हमलाभन्दा अघि जानकारी दिएकोमा अमेरिकी राष्ट्रपति डोनाल्ड ट्रम्पले धन्यवाद भनेका छन् । उनले ‘अग्रिम सुचना दिएकोमा धन्यवाद, यसले कसैको पनि ज्यान नजान र कोही पनि घाइते नहुन सम्भव भयो’ भन्दै इरानप्रति कृतज्ञता प्रकट गरेका छन् ।
अमेरिका, इरान र इजरायलबीचको यो पछिल्लो द्वन्द्वका कारण मध्यपुर्व केही समययता तनावग्रस्त भएको छ । मध्यपुर्वका प्राय देशहरुले पछिल्ला केही दिनयता आफ्नो हवाई उडान बन्द गर्नेदेखि आफ्ना जनतालाई सुरक्षित बस्न भनिसकेका छन् ।
