नेपाल पूर्वाधार 
काठमाडौं । चितवनको भरतपुर महानगरपालिकाले मत्स्य फार्म सञ्चालन गर्ने व्यवसायीलाई व्यवसायीलाई विद्युत महसुलमा ५० प्रतिशत अनुदान दिने भएको छ । महानगरले आर्थिक वर्ष २०७९/८० को स्वीकृत पशु सेवा विकास कार्यक्रम अन्तर्गत हाल सञ्चालनमा रहेका मत्स्य फार्मले खपत गर्ने विद्युत महसुलमा ५० प्रतिशत अनुदान दिन लागेको हो ।
महानगरले मत्स्य पालन गर्ने व्यवसायीलाई विद्युत महसुलमा अनुदान सुविधा लिनका लागि आवेदन पेश गर्न आग्रह गरेको छ । महानगरले २०८० साल असार १५ गतेभित्र प्राप्त हुने गरी सम्बन्धित मत्स्य पालक व्यवसायीसँग आवेदन माग गरेको हो ।
विद्युत महसुलमा आधा अनुदान सुविधा लिन चाहाने मत्स्य पालक व्यवसायीले तोकेको मापदण्ड पूरा गरेको हुनुपर्ने महानगरले जनाएको छ । महानगरले सेवा लिन योग्य व्यवसायीका लागि ६ वटा मापदण्ड तोकेको छ ।
महानगरका अनुसार विद्युत महसुल छुट लिने व्यवसायीले मिटर मत्स्य फार्मको नाममा जडान गरी पोखरीमा पानी भर्ने कार्यका लागि मात्रै उपयोग भएको हुनुपर्नेछ । यस्तै, नेपाल विद्युत प्राधिकरणलाई विद्युत महसुल तिरेको रसिद पेश गर्नुपर्ने सर्त पनि महानगरले राखेको छ ।
विद्युत महसुलमा कुनै हर्जना लागेको हकमा भने त्यस बापतको रकम नव्यहोर्ने महानगरले स्पष्ट पारेको छ । यसअघि अन्य निकायबाट विद्युत महसुलमा अनुदान सुविधा लिइरहेका व्यवसायीको हकमा हकमा भने ती व्यवसायीले यो सुविधा पाउने छैनन् ।
सबै प्रक्रिया पूरा भएपछि विद्युत प्राधिकरणलाई तिरेको महसुलको ५० प्रतिशत रकम महानगरले व्यवसायीलाई भुक्तान गर्नेछ । योग्य मत्स्य फार्मलाई चौमासिक वा एकै पटक विद्युत महसुल अनुदानको सबै रकम बैंक खातामा भुक्तान गर्ने महानगरले जनाएको छ ।
