नेपाल पूर्वाधार 
गाउँकै मोहन झाको घरमा जडान गरिएको समरसेवल पम्पको भरमा स्थानीय बस्नुपरेको छ । दुई बाल्टी पानी भर्न घण्टौँ कुर्नुपर्ने अवस्था छ ।
झाका अनुसार बेतौनामा पछिल्लो पाँच वर्षदेखि पानीको समस्या बढ्दो छ । वर्षायाममा पर्याप्त पानी परे केही समय चापाकलमा पानी आउने गरेको छ । तर, यस वर्ष लामो समयदेखि पर्याप्त पानी नपरेकाले छापाकल सुकेको उनले सुनाए । ‘असार–साउनमा राम्रो पानी पर्दा मंसिर–पुससम्म चापाकलमा थोरै–थोरै पानी आउँथ्यो । तर यस वर्ष लामो समयदेखि पर्याप्त पानी नपर्दा चापाकलबाट पानी आउनै छाडेको छ,’ उनले भने ।
खडेरीका कारण खेतमा धान सिँचाइ गर्न एकैपटक मोटर र दमकल सञ्चालन हुँदा भूमिगत पानीमा थप दबाब परेको उनको भनाइ छ । तत्काल वैकल्पिक व्यवस्था नगरे बेतौनाबासीले अझ ठूलो पानी संकट बेहोर्नुपर्ने उनको अनुमान छ ।
यो वर्षको लामो खडेरीले बेतौनामा घरेलु प्रयोजनका लागि मात्र नभई कृषि उत्पादनमा समेत असर पार्ने देखिएको छ । पर्याप्त वर्षा नहुँदा खेतमा सिँचाइको माग बढेको छ भने भूमिगत पानीको अत्यधिक दोहनले खानेपानीका स्रोतसमेत सुक्दै गएका छन् ।
बेतौना मात्र होइन, पछिल्ला वर्षमा तराई–मधेशका विभिन्न क्षेत्रमा भूमिगत पानीको सतह घट्दै जाँदा खानेपानीको संकट गहिरिएको छ । चुरे क्षेत्रको अनियन्त्रित दोहन, अनियमित वर्षा, लामो खडेरी, भूमिगत पानीको अत्यधिक प्रयोग, परम्परागत पोखरी तथा जलाशयको अतिक्रमण र बढ्दो तापक्रमले पानीको प्राकृतिक पुनर्भरण प्रणाली कमजोर बनाएको छ ।
