Nepal Purbadhar

सोमवार, असार ४, २०८१
Monday, June 17, 2024

सोमवार, असार ४, २०८१
Monday, June 17, 2024
उत्कृष्ट पर्यटकिय गन्तव्य स्थल ‘खुम्बु क्षेत्र’ मा थप पूर्वाधार विस्तार गरिँदै    पूर्वाधार क्षेत्रमा हुने बेरुजु न्यूनीकरणको लागि कानूनी स्पष्टता आवश्यक मुस्ताङको लोमान्थानमा पश्मिना डिडस्टिङ प्लान्ट स्थापना, पश्मिना गुणस्तरमा उल्लेख्य योगदान पुग्ने बेनी-जोमसोम-कोरला सडकको तिप्ल्याङ खण्ड स्तरोन्नति हुँदै दरबाङ-म्याग्दीखोला जलविद्युत् आयोजनाको दोस्रो अडिटमा सुरुङको काम सुरु एमसिसी परियोजना अन्तर्गतको रातमाटे सबस्टेसन निर्माणको जिम्मा टेक्नो इलेक्ट्रिक एण्ड इञ्जिनियरिङ कम्पनीलाई मेलम्ची बाढीको ३ वर्ष: पुनर्निर्माण सुस्त, स्थानीयवासी चिन्तित पेट्रोल, डिजेल र मट्टीतेलको मूल्य घट्यो

मर्स्याङ्दी कोरिडोरको उदिपुर-मार्किचोक-भरतपुर खण्डमा स्थानीय अवरोध हट्यो


काठमाडौं । निर्माणाधीन २२० केभी मर्स्याङ्दी कोरिडोर प्रसारण लाइनको उदिपुर-मार्किचोक-भरतपुर खण्डमा स्थानीयले गरेको अवरोध हटी काम अघि बढेको छ । लमजुङको दोर्दी गाउँपालिका वडा नम्बर १ र २ तथा गोरखाको पालुङटारमा स्थानीयले गर्दै आएको अवरोध हटेपछि निर्माणले गति लिएको हो ।

ऊर्जा, जलस्रोत तथा सिँचाइ मन्त्रालयको समन्वयमा दोर्दी गाउँपालिका वडा नम्बर १ र २ का स्थानीयको माग सम्बोधन गर्ने सहमतिपछि प्रसारण लाइनको अवरुद्ध काम अगाडि बढेको आयोजना प्रमुख चिरन्तनबिक्रम राणाले बताए । उनका अनुसार स्थानीयबासीलाई राहत पुग्ने गरी माग सम्बोधन गर्ने सहमतिपछि प्रसारण लाइनको अवरोध हटेको हो ।

स्थानीय अवरोध हटेसँगै यस क्षेत्रमा प्रसारण लाइनको अवरुद्ध कामको निर्माणले गति पाएको छ । ‘स्थानीयले अवरोध गरेपछि दोर्दीका २ वटा वडाको काम अवरुद्ध भएको अवस्था थियो । यो समस्या हामीले ऊर्जा, जलस्रोत तथा सिँचाइ मन्त्रीसमक्ष राखेका थियौं,’ उनले भने, ‘मन्त्रालयकै पहलमा अहिले समस्या समाधान भई अवरुद्ध काम सुचारु गर्ने वातावरण बनेको छ ।’ उनले प्रसारण लाइनको उदिपुर–भरतपुर खण्डको रुटमा पनि स्थानीय अवरोध हटेर निर्माण सुचारु गर्न बाटो खुलिसकेको बताए ।

स्थानीयले दोर्दीमा प्रसारण लाइनको रुटको जग्गाको उपयोग आफैंले गर्न पाउनु पर्ने,बैंक तथा वित्तीय संस्थामा धितो राखेर कर्जा लिन पाउनु पर्नेलगायत विभिन्न माग राखेर ७ वटा टावर निर्माणमा अवरोध गर्दै आएका थिए । सरकारले नै प्रसारण लाइन निर्माण गरिरहेकाले जनतालाई पनि सहज हुने गरी सहमति गरेर काम अगाडि बढाएको राणाले बताए ।

गोरखाको पालुङटारमा आएको स्थानीय समस्या पनि समाधान भइसकेको छ । यो क्षेत्रमा अहिले जग्गा अधिग्रहणको काम भइरहेको आयोजनाले जनाएको छ । लमजुङको रुटमा जग्गा अधिग्रहणको सम्पूर्ण कार्य पूरा भइसकेको छ । यसअघि प्रसारण लाइनको रुट बदल्नु पर्ने माग राखेर पालुङटार क्षेत्रका स्थानीयले अवरोध गर्दै आएका थिए । प्राधिकरणको पटक–पटकको छलफल तथा परामर्श र मन्त्रालयको पहलपछि यहाँको स्थानीय अवरोध हटेर काम सुचारु भएको हो ।

६७ किलोमिटर लामो यो खण्ड ५५ वटा फाउन्डेसन तयार भएका छन् । १८ वटा टावर निर्माणको काम पनि सम्पन्न भइसकेको छ । यो रुटमा १९२ वटा टावर निर्माण हुँदैछन् । यो खण्डको ६ किलोमिटर प्रसारण लाइन अहिले दोर्दी कोरिडोर बेसिनमा निर्माणाधीन जलविद्युत आयोजनाको विद्युत प्रवाहका लागि उपयोग हुँदैछ ।

यो प्रसारण लाइन हुँदै दोर्दी बेसिनका आयोजनाको विद्युत मर्स्याङ्दी जलविद्युत केन्द्रको स्वीचयार्डमा लगिनेछ । यो खण्डमा अहिले तार तान्ने कार्य अन्तिम चरणमा पुगेको छ । अब २ किलोमिटर क्षेत्रमा तार तान्न बाँकी रहेको राणाले बताए ।

प्रसारण लाइनको यो रुटमा अब कुनै समस्या नआएमा १ वर्षभित्रमा निर्माण सम्पन्न गरेर सञ्चालनमा ल्याउन सकिने राणाले जानकारी दिए । प्रसारण लाइनको वन क्षेत्रको रुटमा भने मन्त्रीपरिषदबाट रुख विरुवा कटानको स्वीकृति लिन बाँकी छ । आयोजनाले मन्त्रिपरिषदबाट स्वीकृति लिने प्रक्रिया अगाडि बढाइसकेको छ ।

२ सबस्टेसन अन्तिम चरणमा

मर्स्याङ्दी कोरिडोर प्रसारण लाइनको उदिपुर–भरतपुर खण्ड अन्तर्गत निर्माणाधीन २ सबस्टेसनको निर्माण सकिन लागेको छ । चितवनको न्यू भरतपुर र लमजुङको उदिपुरमा निर्माणाधीन सबस्टेसनको निर्माण पूरा हुन लागेको हो ।

न्यू भरतपुर सबस्टेसनको निर्माण सकिन लागेकाले भदौभित्र सञ्चालनमा ल्याउने तयारी भइरहेको राणाले बताए । यो सबस्टेसनको करिब ८० प्रतिशत निर्माण सम्पन्न भइसकेको छ ।

कुनै प्राविधिक समस्या नआए अबको २ महिनामा सबस्टेसन सञ्चालन गर्ने नेपाल विद्युत प्राधिकरणको योजना छ । अहिले सबस्टेसनमा उपकरण जडानको काम भइरहेको छ । यो सबस्टेसनमा १६०÷१६० एमभिए क्षमताका पावर ट्रान्सफर्मर जडान गरिँदैछ ।

लमजुङमा निर्माणाधीन उदिपुर सबस्टेसन पनि अन्तिम चरणमा पुगेको छ । यो प्रसारण लाइन आगामी पुसभित्रमा सम्पन्न गरी सञ्चालनमा ल्याउने लक्ष्य छ ।
उदिपुर–मार्किचोक–भरतपुर खण्ड निर्माण सम्पन्न हुँदा २ अर्ब ६० करोड रुपैयाँ खर्च हुने अनुमान छ । मर्स्याङ्दी र यसका सहायक नदीहरूबाट उत्पादन हुने विद्युत प्रवाह गर्ने उद्देश्यले मर्स्याङ्दी कोरिडोर प्रसारण लाइन निर्माण भइरहेको हो ।

यो प्रसारण लाइन निर्माण सम्पन्न हुँदा करिब १ हजार ६ सय मेगावाट विद्युत प्रवाह गर्न सकिनेछ । मर्स्याङ्दी कोरिडोर अन्तर्गत मनाङ्ग–खुदी–उदिपुर खण्डको काम पनि अगाडि बढेको छ । यो खण्ड अन्तर्गत खुदीदेखि मनाङ्गसम्म प्रसारण लाइन निर्माण हुँदैछ ।

अहिले प्रसारण लाइनका लागि जग्गा अधिग्रहणको काम भइरहेको राणाले बताए । प्रसारण लाइनको रुटको डिजाइन तयार भइसकेको छ । बर्खा सकिएपछि प्रसारण लाइनको संरचनाको काम अघि बढाउने प्राधिकरणको योजना छ ।

प्रसारण लइनको यो खण्ड अन्तर्गत खुदी र मनाङ्गको धारापानीमा गरी २ सबस्टेसन निर्माणाधीन छन् । कुदी सबस्टेसन अबको १ वर्षभित्र सम्पन्न गर्ने गरी निर्माणमा गएको छ । धारापानी सबस्टेसनको पनि निर्माण सुरु भइसकेको छ ।


Read Previous

डोली खारेजीको घोषणासँगै समायोजनमा सकसः भौतिक पूर्वाधारपछि अब सहरी विकासका इञ्जिनियरको विरोध

Read Next

सिद्धबाबा सुरुङ मार्गको निर्माण फागुनदेखि, ठेकेदारले डिजाइनको काम थाल्याे

Leave a Reply

Your email address will not be published.