नेपाल पूर्वाधार 
काठमाडौं। विश्व प्रसिद्ध सूचना प्रविधि कम्पनी ह्वावेले नेपालमा फिक्स्ड फिफ्थ जेनेरेसन (एफफाइभजी) प्रविधि र कृत्रिम बौद्धिकतामा आधारित डिजिटल रूपान्तरणलाई तीव्रता दिनु उपयुक्त हुने बताएको छ।
‘एफफाइभजीको विकासलाई तीव्रता दिऔँ, बौद्धिक प्रविधिको प्रयोग बढाऔँ’ भन्ने नारासहित काठमाडौंमा आयोजित एक कार्यक्रममा नेपालका अग्रणी इन्टरनेट सेवा प्रदायक, सूचना तथा सञ्चार प्रविधि क्षेत्रका उद्यमी र सरोकारवालाहरूलाई यस्तो सुझाव दिएको हो। कार्यक्रममा नयाँ पुस्ताको लागि सञ्जाल विस्तार, कृत्रिम बौद्धिकतामा आधारित सेवा तथा डिजिटल पूर्वाधारको विकासबाट नेपाली इन्टरनेट सेवा प्रदायकले लिन सक्ने व्यावसायिक अवसरबारे छलफल गरिएको थियो।
कार्यक्रममा ह्वावेले परम्परागत इन्टरनेट सेवा विस्तारमा मात्र सीमित नरही बौद्धिक सञ्जाल, कृत्रिम बौद्धिकतामा आधारित सञ्चालन प्रणाली र थप मूल्य दिने सेवामार्फत आम्दानीका नयाँ स्रोत विकास गर्न इन्टरनेट सेवा प्रदायकलाई आग्रह गरेको छ।
ह्वावे नेपालका प्रमुख कार्यकारी अधिकृत चेस्टर चेनले नेपालको डिजिटल प्रणाली नयाँ चरणमा प्रवेश गरिरहेको भन्दै सञ्जाल सम्पर्क, आर्थिक वृद्धि, नवप्रवर्तन र डिजिटल समावेशिताको आधार बन्दै गएको बताए।
प्रयोगकर्ताको अपेक्षा परिवर्तन भइरहेकाले इन्टरनेट सेवा प्रदायकले परम्परागत इन्टरनेट सेवाभन्दा माथि उठेर बौद्धिक सञ्जाल, कृत्रिम बौद्धिकतामा आधारित सञ्चालन प्रणाली र नयाँ व्यावसायिक कार्यशैली अपनाउनुपर्ने उनको भनाइ थियो।
चेनले नेपालको इन्टरनेट सेवा उद्योगलाई सहयोग गर्न ह्वावेले नवीन प्रविधि, विश्वव्यापी अनुभव र उत्कृष्ट अभ्यास उपलब्ध गराउँदै सहकार्यलाई निरन्तरता दिने बताए।
कार्यक्रममा ह्वावेका वैदेशिक इन्टरनेट सेवा व्यवसाय एकाइका प्रमुख सञ्चालन अधिकृत लरेन्स वुले कृत्रिम बौद्धिकताले इन्टरनेट सेवा उद्योगमा पारिरहेको प्रभावबारे प्रस्तुति दिएका थिए। उनले उच्च कार्यक्षमतायुक्त सञ्जाल, गणनाका स्रोत र नयाँ डिजिटल सेवाको माग बढ्दै गएको उल्लेख गरे।
नेपालमा विद्युत्को तुलनात्मक रूपमा प्रतिस्पर्धात्मक लागत र कृत्रिम बौद्धिकतासम्बन्धी नयाँ अवसरको उपयोग गर्न सके इन्टरनेट सेवा प्रदायकले परम्परागत इन्टरनेट सम्पर्क सेवाभन्दा बाहिरका क्षेत्रमा समेत आफ्नो व्यवसाय विस्तार गर्न सक्ने उनले बताए।
त्यसैगरी, ह्वावे एसिया प्रशान्त क्षेत्रका प्रकाशीय सञ्जाल निर्देशक एन्डी वुले घरायसी सञ्जालसँगै अन्य सेवा विस्तार गर्ने रणनीतिबारे प्रस्तुति दिएका थिए। उनले सेवाका रूपमा भिडियो निगरानी र सेवाका रूपमा ताररहित इन्टरनेटलाई नेपाली इन्टरनेट सेवा प्रदायकका लागि सम्भावित व्यावसायिक अवसरका रूपमा प्रस्तुत गरे।
उनका अनुसार उच्चस्तरीय घरायसी इन्टरनेट सेवा र थप मूल्य दिने सेवाको विस्तारले ग्राहकको अनुभव सुधार गर्नुका साथै सेवा प्रदायकलाई आम्दानीका थप स्रोत उपलब्ध गराउन सक्छ।
कार्यक्रममा ह्वावे एसिया प्रशान्त क्षेत्रका इन्टरनेट सेवा व्यवसायका प्रमुख प्राविधिक अधिकृत डेभिड हुले कृत्रिम बौद्धिकताको युगमा परम्परागत इन्टरनेट सेवा प्रदायकबाट व्यवस्थित सेवा प्रदायकका रूपमा रूपान्तरण हुने सम्भावनाबारे चर्चा गरेका थिए।
उनले कृत्रिम बौद्धिकताका गणनात्मक एकाइसम्बन्धी सेवा, नमुना सेवाका रूपमा उपलब्ध गराउने प्रणाली र ग्राफिक्स प्रशोधन एकाइलाई सेवाका रूपमा उपलब्ध गराउनेजस्ता अवसरबारे जानकारी दिए। साथै, तथ्याङ्क भण्डारण र सञ्जाल पूर्वाधारको स्तरोन्नतिमा रहेका सम्भावनाबारे पनि चर्चा गरे।
यस्ता सेवाले इन्टरनेट सेवा प्रदायकलाई आफ्ना सेवा विविधीकरण गर्न र बौद्धिक डिजिटल समाधान उपलब्ध गराउन सहयोग पुग्ने उनको भनाइ थियो।
नेपालमा २७ वर्षदेखि सेवा दिंदै आएको ह्वावेले स्थानीय साझेदार, इन्टरनेट सेवा प्रदायक र उद्योगका सरोकारवालासँगको सहकार्यलाई निरन्तरता दिने प्रतिबद्धता व्यक्त गरेको छ। कम्पनीले सञ्जालको गुणस्तर, सञ्चालन दक्षता र डिजिटल सेवा प्रवाह गर्ने क्षमतामा सुधार गर्न सहयोग गर्ने जनाएको छ।
सन् १९८७ मा स्थापना भएको ह्वावेले विश्वका १७० भन्दा बढी देशमा सूचना प्रविधिको पूर्वाधार तथा स्मार्ट उपकरणसम्बन्धी व्यवसाय सञ्चालन गर्दै आएको छ। नेपालमा पनि कम्पनीले दूरसञ्चार तथा सूचना प्रविधिको पहुँच विस्तार, रोजगारी सिर्जना र डिजिटल समावेशिताका क्षेत्रमा काम गर्दै आएको छ। साथै, विपद् व्यवस्थापन, ऊर्जा र शैक्षिक कार्यक्रममार्फत सामाजिक उत्तरदायित्वका गतिविधिमा समेत सहभागी हुँदै आएको।
