पछिल्ला ४ वर्षको तुलनामा भौतिक पूर्वाधार मन्त्रालयको बजेट सबैभन्दा न्यून

काठमाडौं । आगामी आर्थिक वर्ष २०८०÷८१ को लागि भौतिक पूर्वाधार तथा यातायात मन्त्रालयको बजेट निराशाजनक रहेको छ । किनकि पछिल्ला ४ वर्षकोभन्दा आगामी आर्थिक वर्षको लागि विनियोजित बजेट न्यून छ ।

चालु आर्थिक वर्ष (संसोधनअघि)को भन्दा ४४ अर्बले ७४ करोड रुपैयाँले न्यून बजेट विनियोजन भएको छ । संसोधनपछिको भन्दा पनि ३० अर्बले न्यून बजेट आगामी वर्षको लागि विनियोजन गरिएको छ ।

यति मात्र होइन, कुल संघीय बजेटमा भौतिक पूर्वाधार तथा यातायात मन्त्रालयको बजेटको हिस्सा घट्दै गएको छ । यो क्रम पछि २ वर्षदेखि जारी छ । आर्थिक वर्ष २०७८÷७९ मा कुल बजेटको १०.१५ प्रतिशत बजेट भौतिक पूर्वाधार मन्त्रालयलाई विनियोजन गरिएको थियो ।

जबकि चालु आबमा कुल विनियोजित बजेटको ९.८३ प्रतिशत मात्र विनियोजन गरिएको छ । आगामी वर्षको लागि त्यसमा पनि अझै कटौती गरेर कुल बजेटको ७.५१ प्रतिशत मात्र बजेट विनियोजन गरिएको छ । पूर्वाधार क्षेत्रले अझै बढी प्राथमिकता पाउनुपर्ने भनेर महत्वका साथ हेरिएको बजेटमा त्यही सम्बन्धी मन्त्रालयको बजेट भने दयालाग्दो देखिएको छ ।

स्राेतः बजेट पुस्तिकाहरू