नेपाल पूर्वाधार 
म्याग्दी । म्याग्दीको बेनी नगरपालिकाले चालु आर्थिक वर्ष (२०७९/८०) का लागि बजेट विनियाेजन भएका पूर्वाधार आयोजनाकाे काम सुरु गरेकाे छ । नगरपालिकाले ९ कराेड रुपैयाँ लागतका पूर्वाधार आयोजनाकाे कार्यान्वयन थालेकाे हाे ।
महत्त्व र प्राथमिकता दिएका पाँच वटा सडक, तीन वटा खानेपानी, एउटा भवन, एउटा खेल मैदान र एउटा चिस्यानगृह निर्माण गर्ने कार्यकाे थालनी गरेकाे नगरपालिकाको पूर्वाधार शाखाका प्रमुख इञ्जीनियर बिमलरञ्जन कार्कीले बताए । उनले विभिन्न शिर्षकमा ९ कराेड १ लाख बजेट विनियाेजन भएका ती आयोजनाकाे कार्यान्वयन प्रक्रिया सुरु गरिएकाे बताए ।
उनका अनुसार ७ वटा ठूला आयोजनाकाे ठेकेदार छनाेट प्रक्रिया पनि पूरा भइसकेकाे छ । “ठेक्काबाट २ वटा आयोजनाकाे निर्माण सुरु भइसकेकाे छ । अरु ५ आयोजना पनि निर्माणमा जान तयारी अवस्थामा छन्”, उनले भने, “थप ३ वटा आयोजनाकाे निर्माण सुरु गर्न ठेक्का आह्वान भएको छ । एउटाको लागत अनुमान तयार गरेर ठेक्का प्रक्रियामा लैजाँदै छाैं।”
नगरपालिकाले १ एक करोड रुपैयाँ बजेट विनियोजन गरेको बेनी–पाखापानी सडकअन्तर्गत वडा नम्बर ६ ,अर्थुङ्गेबाट वडा नम्बर ९ को सिमानासम्म सडक ढलान, नाली, घुम्ती र ग्रेड सुधार गर्न कृसु निर्माण सेवा काठमाडौंले ६६ लाख ९३ हजार ३ सय ९१ रुपैयाँमा ठेक्का पाएको कार्कीले जानकारी दिए । १ करोड २१ लाख रुपैयाँ लागत अनुमान गरिएको अर्थुङ्गे–पुलाचौर–भुतपानी सडक निर्माणका लागि उत्तरगङ्गा निर्माण सेवा बेनीले ८५ लाख ४० हजार रुपैयाँमा ठेक्का पाएको छ ।
गण्डकी प्रदेश सरकारबाट ५० लाख रुपैयाँ, नगरपालिकाको गौरवका आयोजना शीर्षकमा २५ लाख रुपैयाँ र समपूरक कोषबाट ४६ लाख रुपैयाँ विनियोजन छ । यो योजनामार्फत वडा नम्बर ६ को बाँसबोटसम्म तीन–तीन सय मिटर ढलान र कालोपत्रका साथै नाली निर्माण गर्ने लक्ष्य छ ।
७० लाख रुपैयाँ लागत अनुमान गरिएको बेनी–महारानीथान–छाप–ठूलोखोला सडक योजना खुसीहोम बिल्डर्सले ५८ लाख रुपैयाँमा ठेक्का लिएको छ । वडा नम्बर ४ र ६ को भूगोलमा ग्यावियन पर्खाल, नाली, सोलिङ र ढलान गर्न लागिएको हो ।
२५ लाख रुपैयाँ विनियोजन भएको बेनी–ज्यामरुककोट सडकको तल्लो क्षेत्रमा पहिरो नियन्त्रण र माथिल्लो खण्डमा नाली बनाउन भगवती मालिका कन्ट्रक्सनले २० लाख ५० हजार रुपैयाँमा ठेक्का लिएको छ ।
२३ लाख ३० हजार रुपैयाँ विनियोजन भएको बेनपा–४ को तातोपानी बजार कालोपत्र गर्ने आयोजना सोमरस निर्माण सेवाले २१ लाख २२ हजार रुपैयाँमा ठेक्का पाएको छ । तल्लो तातोपानी बजारभित्र प्रिमिक्स प्रविधिको कालोपत्र गरिने नगरपालिकाले जनाएको छ ।
५० लाख रुपैयाँ विनियोजन भएको बेनी मिनी रङ्गशाला योजना निर्माणका लागि ३५ लाख ९३ हजार रुपैयाँमा ठेक्का लिएको उत्तरगङ्गा निर्माण सेवाले पर्खाल र प्यारापिट निर्माण सुरु गरेको छ । नगरपालिकाको प्रशासकीय भवनको तला थप गर्ने आयोजनाको ठेक्का पाएको शङ्कर निर्माण सेवाले पनि काम तीव्ररूपमा गरिरहेको छ ।
७३ लाख रुपैयाँ बजेट विनियोजन भएको नगरपालिकाको भवनमा तला थप गर्ने योजना ५२ लाख ५८ हजार २ सय रुपैयाँमा ठेक्का सम्झौता भएको थियो । सङ्घीय सरकारको एक–एक करोड रुपैयाँ अनुदान प्राप्त गाजने–नयाँगाउँ–ढोलठान–पुलाडाँडा र पात्लेखेत काछलुङ खानेपानी आयोजनाको ठेक्का आह्वान भएको छ । विशेष अनुदानबाट ४९ लाख ३० हजार रुपैयाँ प्राप्त खबरा खानेपानी आयोजनाको अधुरो कामलाई पूर्णता दिन पनि ठेक्का आह्वान भएको छ ।
सङ्घीय सरकारको ७० लाख रुपैयाँ , प्रदेश सरकारको ५० लाख रुपैयाँ अनुदान र नगरपालिकाले ७० लाख रुपैयाँ विनियोजन गरेको चिस्यान गृह निर्माणका लागि ठेक्का आह्वान गर्ने तयारी छ । बेनी नगरपालिका–४ सिङ्गामा ३ सय मेट्रिक टन क्षमताको फलफूल र तरकारी भण्डारण गर्ने चिस्यान गृह बनाउन लागिएको नगरप्रमुख सुरत केसीले बताए । १५ लाख रुपैयाँ बजेट विनियोजन भएकाे आयोजना उपभोक्ता समिति र सोभन्दा बढी बजेटका आयोजना ठेक्का प्रक्रियाबाट कार्यान्वयन गर्ने नगरप्रमुख केसीले बताए ।
