नेपाल पूर्वाधार 
म्याग्दी । ट्र्रयाक (मार्ग) खोलेको २३ वर्षपछि म्याग्दीको रत्नेचौर-भकुण्डे-भकिम्ली सडकमा कालोपत्रे गर्न सुरु गरिएकाे छ । भौतिक पूर्वाधार मन्त्रालयले बेनी नगरपालिकाको वडा नम्बर–१ रत्नेचौरको उपल्लाचौरदेखि अर्जमसम्म, वडा नम्बर–२ को ज्यामरुककोट, स्यानालेक, तोराखेत हुँदै वडा नम्बर–३ काे भकिम्ली जोड्ने सडक स्तरोन्नतिको काम सुरु गरिएकाे हाे ।
एक निर्वाचन क्षेत्र एक सडक आयोजनामा समावेश भएको यो सडक कालोपत्रका लागि ठेक्का सम्झौता गरेको निर्माण कम्पनीले प्रारम्भिक चरणको काम थालेको बेनी–१ का वडाध्यक्ष टेकबहादुर थापाले जानकारी दिए । भकुण्डे र उपल्लाचौर क्षेत्रमा डोजरले सडक फराकिलो बनाउने र मजदुरबाट पर्खाल, नालि निर्माण गर्न लागिएकाे हाे ।
बेनी नगरपालिकाको १, २ र ३ नम्बर वडाका बासिन्दाले प्रयोग गर्ने यो सडककाे २०५६ सालमा पहिलाे पटक सडक मार्ग खोलिएको थियाे । त्यस यता याे सडकमा सामान्य मर्मतको भरमा यातायात सञ्चालन हुँदै आएको थियो ।
सडक निर्माणका लागि २०७९ साल भदौ ६ गते गजेन्द्र–नयाँबाटो जेभी र सडक डिभिजन कार्यालय बागलुङबीच २३ करोड ३२ लाख रुपैयाँमा ठेक्का सम्झौता भएको थियो । तोकिएको ३० महिनाको अवधिभित्र सडक निर्माणको काम सक्ने तयारीसहित उपकरण र मजदुर परिचालन गरिएकाे निर्माण कम्पनीका सञ्चालक अरुण सेढाईले बताए ।
सडकलाई ९ मिटर फराकिलो बनाएर ७ किलोमिटर डिबिएसडी प्रविधिको कालोपत्रे र २ किलोमिटर आरसिसी ढलान गर्ने सम्झौता भएको छ । यसैगरी, घुम्ती तथा मोड सुधार र ग्रेड मिलाउने काम पनि सडक खण्डमा गरिनेछ । हाल ४ देखि ५ मिटर फराकिलो सडक हिउँदमा धुलाम्मे र हिउँदमा हिलाम्मे हुने समस्या छ ।
सङ्घीय सरकारले प्रत्यक्ष निर्वाचित सांसदको सिफारिसमा सबै निर्वाचन क्षेत्रमा एक/एक वटा रणनीतिक महत्त्वकाे सडक आयोजना सञ्चालन गर्न ४०/४० करोड रुपैयाँ विनियोजन गरेको थियो । त्यस क्षेत्रका निवर्तमान सांसद भूपेन्द्रबहादुर थापाले म्याग्दीका प्रमुख ३ रणनीतिक सडक मध्य कुनै पनि कार्यक्रममा नसमेटिएको र बागलुङको ताराखोला गाउँपालिकासँग जोड्ने भएकाले रत्नेचौर–भकुण्डे–भकिम्ली–बरंजा सडक आयोजनालाई सिफारिस गरिएकाे बताए ।
“बेनी–दाना सडक कालीगण्डकी कोरीडोर र बेनी–दरवाङ सडक प्रदेश सरकारको कार्यक्रममा छ”, उनले भने, “आर्थिक वर्ष २०५५/५६ मा खनिएको यो जिल्लाको अर्को रणनीतिक महत्त्वकाे सडक भएकाले स्तरोन्नतिका लागि सिफारिस गरिएको हो ।”
पहिलो चरणमा उपल्लाचौरदेखि बेनी नगरपालिकाको वडा नम्बर–३ तोराखेतसम्म ९ किलोमिटर दूरीमा कालोपत्रे गर्ने लक्ष्य छ । भकिम्ली–बरङ्जा–अर्मनको किमचौर हुँदै ताराखोलासम्म मार्ग खोलिसकिएको छ । यसअघि सङ्घीय सरकारकै बजेटबाट सडकको प्रवेशबिन्दुमा पर्ने रत्नेचौरदेखि उपल्लाचौरसम्म १.३ किलाेिमटर मिटर सडक कालोपत्र गरिएकाे थियाे । ३ सय मिटर सडक ढलान गरिएको थियो ।
सडक कालोत्रप भएपछि रत्नेचौर, उपल्लाचौर, सालघारी, अर्जम, फापरखेत, भकुण्डे, स्यानालेक, तोराखेत र भकिम्लीका बासिन्दालाई निकासी, ढुवानी र आवत–जावतमा सहज हुने अपेक्षा गरिएको छ ।
