नेपाल पूर्वाधार 
दमौली। तनहुँको देवघाट गाउँपालिका-४ का ५ गाउँमा विद्युत सेवा विस्तार गरिएकाे छ । नेपाल विद्युत प्राधिकरणले वितरण प्रणाली विस्तार गरी ढुङ्गाघारी, बसेनी, काफलस्वाँरा, बापस र डुडेबासपानी गाउँमा विद्युत पहुँच पुर्याएकाे हाे ।
प्राधिकरण भरतपुर वितरण केन्द्र आँपटारी ‘सवस्टेसन’मार्फत निकालिएकाे फिडरबाट यी गाउँमा विद्युत पुर्याइएकाे देवघाट-४ का वडाध्यक्ष मित्रलाल गुरुङले जानकारी दिए । उनका अनुसार वितरण प्रणाली विस्तार हुँदा यी गाउँका १३० घरधुरीमा विद्युत पहुँच पुगेकाे छ ।
विद्युत वितरणका लागि मिटर र प्राविधिक सेवा भने तनहुँको आँबुखैरेनी सवस्टेसनले उपलब्ध गराएका थियो । विद्युत् प्राधिकरण आँबु उपवितरण केन्द्रका प्रमुख राजवीर यादवको उपस्थितिमा ती घरधुरीमा विद्युत् आपूर्ति सुचारु भएको छ ।
वडाध्यक्ष गुरुङका अनुसार केही दिनभित्रै सोही वडाको चारघरेमा एक सय केभीएको ट्रान्सफर्मर जडान गरिनेछ । यसबाट पारलाझ्ग, चारघरे, साराङघाट, भुवनबस्ती र अग्रीडाँडामा विद्युत् विस्तारका लागि सहयोग हुनेछ ।
हालसम्म टुकी र सोलारको भरमा उज्ज्यालोको सहारा लिँदै आएका स्थानीयवासी विद्युत् पुगेपछि खुसी भएका छन् । गत वर्षको स्थानीय तह निर्वाचन अगाडि आमडाँडा, गाईघाट, आइलिम, सिन्चाङ, खोडेमोहोरिया र दुईघरेमा मात्रै विद्युत् पुगेको थियो ।
करिब चार/पाँच वर्षअघि नै उक्त गाउँमा बिजुली जडानका लागि ठेक्का सम्झौता भए पनि ठेकेदारको लापर्वाहीको कारण बीचमा काम रोखिएको थियो । “म वडामा निर्वाचित भएर आएपछि रोकिएको विद्युतीकरणको कामलाई अगाडि बढाउन पहल गरेको हुँ । त्यसैको प्रतिफलस्वरुप गाउँमा पहिलोपटक बिजुली बत्ती बलेको छ ,” उनले भने ।
उनकाअनुसार यहाँ धेरै वर्ष पहिला बत्ती बल्नुपर्ने हो । तर, स्थानीय सरकारको उदासिनता र ठेकेदारको ढिलासुस्तीले कामले गति लिन सकेको थिएन । बिजुलीको अभावमा अहिलेसम्म वडा कार्यालय सिन्चाङमा स्वास्थ्यचौकीको भवनबाट सञ्चालन हुँदै आएकामा अब चाँडै काफलडाँडामा निर्मित आफ्नै भवनबाट सेवा प्रवाह गरिने उनले बताए ।
वडा कार्यालयको भवन निर्माण भइसकेको र त्यसमा बत्ती पनि जडान भइसकेकाले अब चाँडै इन्टरनेटसमेत जडान गरेर उक्त भवनबाट सेवा सुरु गर्ने तयारी गरिएको छ ।
