नेपाल पूर्वाधार 
काठमाडौं । गैरआवासीय नेपाली संघ (एनआरएनए) को ११औं अन्तर्राष्ट्रिय महाधिवेशनबाट नयाँ कार्यसमिति चयनका लागि हुन लागेको निर्वाचनमा राजेन्द्रकुमार (आरके) शर्मा प्यानलले उम्मेद्वारी घोषणा गरेको छ । शर्मा प्यानलले शुक्रबार पत्रकार सम्मेलनको आयोजना गरी एनआरएनएको आगामी कार्यसमिति चयनका लागि असोज ३० देखि कात्तिक ३ (अक्टोबर १०–२०) सम्म काठमाडौंमा हुन लागेको निर्वाचनका लागि उम्मेद्वारी घोषणा गरेको हो ।
अध्यक्ष पदमा कतारमा व्यवसाय गर्दै आएका हालको कार्यसमितिका उपाध्यक्ष शर्माले उम्मेद्वारी घोषणा गरेका छन् । कार्यक्रमलाई सम्बोधन गर्दै शर्माले २४ महिनामा २४ काम गर्दै बाचा गर्दै अध्यक्ष पदका लागि चुनावी प्रतिश्पर्धामा उम्मेद्वारी घोषणा गरे । उनले विश्वका ४० देशमा बसोबास गर्ने नेपाली समक्ष पुगेर उनीहरूको सुझाव र सल्लाहका आधारमा २४ बुँदे घोषणापत्र तयार गरिएको बताउँदै निर्वाचित भएमा सबै बाचा कार्यान्वयन गर्दै प्रतिबद्धता समेत जनाए ।
यस्तै, उपाध्यक्ष पदका लागि ७ जनाले उम्मेद्वारी घोषणा गरेका छन् । उपाध्यक्ष पदका लागि खगेन्द्र न्यौपाने, रुबिनप्रसाद श्रेष्ठ (गोविन्द), राज रेग्मी, विजय मोक्तान, अभिमान सिंह बस्नेत र शशीकान्त पौडेलले उमेद्वारी दिएका छन् ।
न्यौपाने मसेलियामा बसोबार गर्दै आएका गैरआवासीय नेपाली हुन् । उम्मेद्वारी घोषणा गर्दै न्यौपानेले घोषणापत्रमा आएका २४ बाचा कार्यान्वयनका लागि खबरदारी गर्ने बताए ।
उपाध्यक्षका अर्का उम्मेद्वार गोविन्द जापानमा बसोबार गर्दै आएका गैरआवासीय नेपाली हुन् । उमेद्वारी घोषणा कार्यक्रममा बोल्दै उनले एनआरएनएको सहजीकरण तथा शुद्धिकरणका लागि उमेद्वारी घोषणा गरिएको बताए । रेग्मी कतारमा बस्दै आएका गैरआवासीय नेपाली हुन् ।
धनुषा घर भई हाल कतारमा व्यवसाय गर्दै आएका युवा उद्यमी बासित वर्तमान कार्यसमितिका युवा संयोजक हुन् । उनले एनआरएनएमा युवालाई पद मात्रै दिएर भूमिका नदिने गरिएकाले युवाका लागि आफ्नो भिजन कार्यान्वयन गर्न उमेद्वारी घोषणा गरेको बताए । उनले एनआरएनएको आगामी कार्यसमितिका लागि युवा उपाध्यक्षमा निर्वाचित भएमा युवा स्वरोजगार अभियान चलाउने प्रतिबद्धता समेत जनाए ।
उपाध्यक्षका अर्का उम्मेद्वार बस्नेत अष्ट्रेलियमा बसोबास गर्दै आएका गैरआवासीय नेपाली हुन् । उनले एनआरएनएको आगामी कार्यकालका लागि निर्वाचित भएमा पुख्र्यौली पर्यटनलाई प्रवद्र्धन गरी विदेशमा बसोबास गरिरहेको नयाँ पुस्तालाई नेपाल भ्रमणमा ल्याउने बताए ।
यस्तै, उपमहासचिवमा संयुक्त अरब इमिरेट्समा व्यवसाय गर्दै आएका प्रणीण गुरुङको उमेद्वारी परेको छ । सचिव पदका लागि हुने प्रतिश्पर्धाका लागि ४ जनाको उम्मेद्वारी परेको छ । सचिवमा उम्मेद्वारी घोषणा गर्नेमा लोक दाहाल, मनोजकुमार श्रेष्ठ (गोर्खाली), टंग गैरे र आरसी पोखरेल छन् ।
यसैगरी, घोषणध्यक्ष पदका लागि ठाकुरप्रसाद ढुंगानाले उमेद्वारी दिने घोषणा गरेका छन् भने महिला संयोगकका लागि देवकी खत्री गुरुङ चुनावी प्रतिश्पर्धामा उत्रने भएकी छन् ।
स्थापनाकालदेखि नै प्रत्येक दुई वर्षमा महाधिवेशनमार्फत अन्तर्राष्ट्रिय समन्वय परिषद्का पदाधिकारीहरूको चयन गर्दै आएको एनआरएनले ११औँ महाधिवेशनलाई २०औँ वर्षगाठ अवसरका रूपमा समेत मनाउँदैछ ।
एनआरएनएको महाधिवेशन उद्घाटन राष्ट्रपतिबाट यही असोज ३० गते बिहान हुने तय भएको छ । सोही दिन अपराह्नदेखि कात्तिक १ गतेसम्म विश्व ज्ञान सम्मेलन हुनेछ ।
सोही अवधिमा महिला र युवा विषयक सत्र पनि सञ्चालन हुने तय भएको छ । कात्तिक २ गते २४ घण्टा अनलाइनबाट मतदान हुने निर्वाचन कार्यतालिका छ । मतदानपछि समापन समारोह कात्तिक ३ गते साँझ प्रधानमन्त्रीले गर्ने भएका छन् ।
एनआरएनएले पहिलोपटक अनलाइन माध्यमबाट मतदान गर्ने व्यवस्था गरेको छ । मतदान गर्न ‘फेसियल भेरिफिकेशन’ एप प्रयोग गरिने भएको छ । मतदान हुनु २४ घण्टाअघि सबै मतदातालाई यो एपको लिङ्क पठाइने छ । लिङ्क खोलिसकेपछि अनुहार देखाएर त्यस एपले अनुमति दिएपछि मात्र मतदान गर्न पाइने व्यवस्था गरिएको छ ।
उम्मेदवारी दिने अवधि असोज २७ गतेसम्म तोकिएको छ । असोज २९ गतेसम्म उम्मेदवारले प्रस्तावक र समर्थकसहितको सनाखत महाधिवेशनस्थलमै उपस्थित भएर गरिसक्नुपर्ने निर्वाचन तालिका छ ।
महाधिवेशनमा कुल ७४ जना अन्तर्राष्ट्रिय समन्वय परिषद्का पदाधिकारीका लागि निर्वाचन हुनेछन् । सन् २००३ अगष्टमा लण्डनमा सम्पन्न गैरआवासीय नेपालीहरूको एक भेलामा व्यापक छलफल भई सोही वर्षको ११ अक्टोवरमा काठमाडौँमा पहिलो विश्व सम्मेलन आयोजना गरी एनआरएनए स्थापना गरिएको हो । गैरआवासीय नेपाली सङ्घ, गैरआवासीय नेपालीसम्बन्धी ऐन २०६४ तथा नियमावली २०६६ अनुसार विधिवतरूपमा नेपाल सरकारको परराष्ट्र मन्त्रालयमा दर्ता भएको संस्था हो ।
नेपालीका लागि नेपाली भन्ने मूलमन्त्र बोकेर आफ्नो स्थापनाको दुई दशक पूरा गरेको यस संस्थाले विश्वभरका करिब एक लाख नेपालीलाई सङ्गठित गरी हाल विश्वका ८६ देशमा आफ्नो सञ्जाल विस्तार गरिसकेको छ । सार्क राष्ट्रबाहेकका अन्य देशमा राष्ट्रिय समन्वय परिषद्हरू गठन गरी अन्तर्राष्ट्रियस्तरमा नै स्थापित, सङ्गठित र परिचालित हुनसक्ने नेपाली मूलको गैरसरकारी अन्तर्राष्ट्रिय सञ्जालको रूपमा आफुलाई विकसित गर्नसक्नु यस संस्थाको उपलब्धि हो ।
