Nepal Purbadhar

शुक्रबार, अशोज १४, २०७९
Friday, September 30, 2022

शुक्रबार, अशोज १४, २०७९
Friday, September 30, 2022

पूरा भयो इनरुवा सबस्टेसन,२ सातामा सञ्चालन गर्ने तयारी


काठमाडौं । सुनसरीस्थित २२०/१३३/३३ केभी इनरुवा सबस्टेसन अबको २ सातामा सञ्चालनमा आउने भएको छ । सबस्टेसनको सम्पूर्ण निर्माण कार्य पूरा भइसकेकाले सञ्चालन हुने चरणमा पुगेको हो ।

अहिले सबस्टेसनको आन्तरिक परीक्षण चलिरहेको आयोजना प्रमुख श्याम यादवले बताए । उनका अनुसार सबै परीक्षण सकिएपछि सबस्टेशनलाई लोड दिएर चार्ज गरिनेछ ।

‘लक्ष्यभन्दा केही ढिला भए पनि सबस्टेसन अब सञ्चालनका लागि तयार भएको छ,’ उनले भने, ‘हामीले ३३ केभीमा त चार्ज गरेर हेरिसकेका छौं । अब २२०/१३२ केभीमा सञ्चालन गर्नका लागि परीक्षण चलिरहेको छ ।’ उनले परीक्षणका क्रममा कुनै प्राविधिक समस्या नआएमा सबस्टेसन सञ्चालनमा ल्याउन ढिलाइ नहुने बताए ।

सबस्टेसन सञ्चालनमा आउँदा पूर्व क्षेत्रको प्रसारण प्रणालीको गुणस्तरमा सुधार आउने उनले बताए । प्रसारण तथा वितरण प्रणालीको समस्याका कारण पूर्वका उद्योगहरूले गुणस्तीय विद्युत सेवा पाउन सकिरहेका छैनन् । सबस्टेसन सञ्चालनमा आउँदाभोल्टेलमा पनि सुधार आउनेछ ।

यस्तै, यो सबस्टेसन पूर्ण क्षमतामा सञ्चालनमा आउँदा २२० केभी कोसी कोरिडोर प्रसारण लाइनको तुम्लिङटार–इनरुवा खण्ड पनि पूर्ण क्षमतामा सञ्चालनमा आउनेछ । यो प्रसारण लाइन अहिले वैकल्पिकरूपमा ३३ केभीमा सञ्चालन गरिएको छ । नयाँ बनेको सबस्टेसन सञ्चालनमा आएपछि कोसी कोरिडोरमा प्रवाह हुने भोजपुर, संखुवासभा र तेह्रथुममा सञ्चालित जलविद्युत आयोजनाहरूको विद्युत इनरुवा आइपुग्नेछ ।

इनरुवा सबस्टेसन निर्माण सम्पन्न हुँदा ८५ करोड रुपैयाँ खर्च भएको अनुमान छ । नेपाल विद्युत प्राधिकरणले विश्व बैंकको सहुलियतपूर्ण ऋणमा नेपाल–भारत विद्युत प्रसारण तथा व्यापार आयोजना अन्तर्थत यो सबस्टेसन निर्माण गरेको हो । सबस्टेसन निर्माण गर्न गरिएको पहिलो ठेक्का रद्ध गरी दोस्रो पटक २०७५ सालको पुसमा दोस्रो पटक ठेक्का सम्झौता गरेर काम सुरु गरिएको थियो ।

यो सबस्टेसन पहिले नै निर्माण सम्पन्न भई सञ्चालनमा आउनु पर्ने भए पनि कोरोना (कोभिड–१९) महामारी, बर्खाको बाढीमा भएको डुबानलगायत कारणले केही ढिला गरी निर्माण सम्पन्न भएको छ । यो सबस्टेसन स्वचालित प्रणालीबाट सञ्चालन हुनेछ ।

प्रसारण प्रणालीको गुणस्तर सुधार गर्ने उद्देश्यले इनरुवा–हेटौंडा प्रसारण लाइन आयोजना अन्तर्गत यो सबस्टेसन निर्माण गरिएको हो । यही आयोजना अन्तर्गत हेटौंडामा पनि अर्को सबस्टेसन निर्माणाधीन छ । यो प्रसारण लाइन निर्माण सम्पन्न भई सञ्चालनमा आउँदा कोसी कोरिडोरमा जोडिने विद्युत हेटौंडासम्म ल्याउन सकिनेछ ।


Read Previous

हाइड्रोजनबाट मल कारखानाको सम्भावना अध्ययन गर्न समिति

Read Next

ऊर्जामन्त्री भुसालसँग भारतीय राजदूतको शिष्टाचार भेट, विद्युत व्यापारका लागि पहल गर्ने भनाइ

Leave a Reply

Your email address will not be published.