चीनले साढे २ वर्षमा विद्युत जडित क्षमतामा नवीकरणीय ऊर्जाको हिस्सा ३३ प्रतिशत पुर्याउने

सांघाई । चीनले अबको साढे २ वर्षमा कूल जडित क्षमताको ३३ प्रतिशत विद्युत नवीकरणीय ऊर्जाको स्रोतबाट उत्पादन गर्ने भएको छ । बढ्दो कार्बन उत्सर्जन न्यूनिकरण गर्ने उद्देश्यले सन् २०२५ सम्ममा प्रसारण प्रणालीमा जडित क्षमताको ३३ प्रतिशत विद्युत नवीकरणीय ऊर्जाको स्रोतबाट पुर्याउने लक्ष्य लिइएको हो ।

सन् २०२० सम्मको तथ्याङ्क अनुसार चीनको प्रसारण प्रणालीमा नवीकरणीय ऊर्जाको स्रोतबाट उत्पादन भएको विद्युतको हिस्सा २८.८ प्रतिशत छ । अबको साढे २ वर्षमा नवीकरणीय ऊर्जामा लगानी बढाई ४.२ प्रतिशत नवीकरणीय ऊजाको विद्युत थपिने त्यहाँको योजना निर्माण गर्ने एजेन्सीलाई उदृत गर्दै अन्तर्राष्ट्रिय सञ्चार माध्यमहरूले जनाएका छन् ।

प्रसारण प्रणालीमा नवीकरणीय ऊर्जाको हिस्सा ३३ प्रतिशत पुग्दा १ अर्ब टन कोइलाको खपत कम गर्न सकिने त्यहाँको राष्ट्रिय विकास तथा सुधार आयोगले जनाएको छ । आयोगका अनुसार गैर–जीवाश्मा इन्धन (नन–फोसिल फ्युल ) को उत्पादन २० प्रतिशत पूर्वाउन ठेक्का प्रस्ताव गरिएको छ ।
सन् २०२० सम्मको तथ्याङ्क अनुसार कूल प्राथमिक ऊर्जाको १५.४ प्रतिशत नन–फोसिल इन्धन खपत भइरहेको छ । यसलाई बढाएर २० प्रतिशत पुर्याउने लक्ष्य लिइएको हो ।

चीनले नवीकरणीय ऊर्जा उत्पादन बढाउन सौर्य, वायु र जलविद्युत उत्पादनमा लगानी बढाउँदै लगेको छ । चीनले उत्तर पश्चिम मरुभूमि क्षेत्रमा ठूला सौर्य तथा वायु ऊर्जाका विद्युत आयोजनाहरू निर्माण गरिरहेको छ ।
सन् २०३० सम्ममा सौर्य र वायु ऊर्जाको जडित क्षमता १२ सय गिगावाट पुर्याउने लक्ष्य निर्धारण गरेको छ । यो अहिलेको मौजुदा जडित क्षमताको दोब्बर हो ।

विश्वमै अधिक कार्बन उत्सर्जन गर्ने चीनले सन् २०२५ सम्ममा अधिक ऊर्जा खपतको लक्ष्य निर्धारण गर्ने जलवायु समूहहरूले अपेक्षा गरेका थिए । यसअघि सन् २०३० सम्ममा चीनको कार्बन उत्सर्जन उच्चतम विन्दुमा पुग्ने चीनले बताइसकेको छ ।

अहिलेसम्म विद्युत खपत उच्च विन्दुमा पुग्दा कार्बन उत्सर्जन हुने गरी कति ऊर्जा खपत हुन्छ भन्ने प्रक्षेपण भइनसकेको समाचारमा जनाइएको छ । यदपि सन् २०२५ सम्ममा कूल ५ अर्ब टन कोइलाको उपयोग बराबरको विद्युत खपत हुने अनुमान गरिएको छ ।

सनु २०२१ देखि २०२५ सम्ममा प्रणालीमा आउने विद्युतको आधाभन्दा बढी हिस्सा नवीकरणीय ऊर्जाबाट उत्पादन हुने भनिएको छ । तर, चीनले अझै पनि ऊर्जा सुरक्षा सुधारमा ध्यान नदिई कोइलामा आधारित थर्मल प्लान्टहरू निर्माण गर्ने अनुमतिपत्र धमाधम दिइरहेको छ ।

अन्तर्राष्ट्रिय समाचार एजेन्सीहरूको सहयोगमा अनुवाद