नेपाल पूर्वाधार 
दमौली । तनहुँको देवघाट गाउँपालिका र चितवनको भरतपुर महानगरपालिका जोड्न त्रिशूली नदीमा निर्माण भएकाे ठिमुरा पक्की पुलकाे औपचारिक उद्घाटन शनिबार (चैत १७ गते) हुने भएकाे छ । निर्माण सम्पन्न भइ सञ्चालनमा आएकाे याे पुलकाे औपचारिक उद्घाटन हुन लागेकाे हाे ।
राष्ट्रपति रामचन्द्र पाैडेलबाट पुलकाे औपचारिक उद्घाटन गराउने याेजना बनेकाे भएकाे देवघाट गाउँपालिकाका अध्यक्ष तिलबहादुर थापाले बताए । तनहुँको देवघाट गाउँपालिका–५ घिनाटार र भरतपुर महानगरपालिका–१ ठिमुरा जोड्ने याे पुल निर्माण पूरा भई सञ्चालन भइसकेको छ ।
पुल निर्माण उपभोक्ता समितिका अध्यक्ष टङ्कनाथ पौडेलले राष्ट्रपति पौडेलसमक्ष याे पुल उद्घाटनका निम्ति अनुरोध गर्ने निर्णय भएको बताए । पुल उद्घाटनका निम्ति राष्ट्रपतिलाई आमन्त्रण गरिएको सन्दर्भमा बुधबार तनहुँ र चितवनका प्रमुख जिल्ला अधिकारीसहितको सुरक्षा प्रमुखहरुको बैठक बस्न लागेकाे पनि उनले बताए ।
२०७१ कात्तिक २० गते निर्माण थालिएको पुल १० वर्षमा सम्पन्न भइ हालै सञ्चालनमा आएकाे हाे । ठेक्का सम्झौता भएको मितिले तीन वर्षमा सम्पन्न गर्ने गरी एलाइट, एड्भेन्जर र इन्द्रेणी जेभी भरतपुरले ठेक्का पाएकाे थियाे । तर, निर्माणका क्रममा २०७७ साल चैत २४ गते पहिलोपटक र दोस्रो पटक २०७९ बैशाखमा पुल भत्किएपछि निर्माण अवधि र समय दुवै बढेकाे थियो ।
पुल निर्माणका लागि सुरुमा १९ करोड १० लाख ६६ हजार रुपैयाँमा ठेक्का सम्झौता भएको भए पनि संशोधित लागत २१ करोड ६८ लाख ४८ हजार रुपैयाँ पुगेकाे छ । यो पुल सञ्चालनमा आएसँगै देवघाट आवतजावत गर्ने भक्तजन र सर्वसाधारण लाभान्वित भएका छन् ।
