नेपाल पूर्वाधार 
काठमाडौं । आगामी आर्थिक वर्ष (२०८०/८१) मा ९ सय मेगावाट विद्युत राष्ट्रिय प्रसारण प्रणालीमा जोडिने भएको छ । अर्थ प्रकाशशरण महतले संघीय संसदमा आगामी आर्थिक वर्षको बजेट प्रस्तुत गर्दै अहिले निर्माणाधीन जलविद्युत आयोजनाको यति विद्युत नयाँ आर्थिक वर्षमा प्रसारण प्रणालीमा जोडिने बताए ।
उनले १११ मेगावाटको रसुवागढी, १०२ मेगावाटको मध्ये भोटेकोसी, ४२.५ मेगावाटको सान्जेलसहित निजी क्षेत्रबाट निर्माण भइरहेका आयोजना सम्पन्न भई राष्ट्रिय प्रसारण प्रणालीमा जोडिने बताए । उनले विद्युत आगामी आर्थिक वर्षमा विद्युत जडित क्षमता बढेर ३ हजार ६ सय मेगावाट पुग्ने प्रक्षेपण गरिएको बताए ।
विद्युत उत्पादन बढ्दै गएरहेकाले आगामी आर्थिक वर्षमा प्रतिव्यक्ति विद्युत खपत ४५० किलोवाट घन्टा पुर्याउने लक्ष्य रहेको बताए ।
अर्थमन्त्री महतले रणनीतिक महत्त्वकाे पश्चिम सेती जलाशय जलविद्युत परियोजना, सेती रिभर–६, तल्लो अरुण लगायतका जलविद्युत आयोजनाको परियोजना विकास सम्झौता गरी निर्माण कार्य अघि बढाइने बताए ।
सुख्खा यामको विद्युत माग सम्बोधन गर्न र जलविद्युत निर्यात गर्न १ हजार २ सय मेगावाट क्षमताको बुढीगण्डकी र ६ सय ३५ मेगावाट क्षमताको दूधकोशी जलाशययुक्त जलविद्युत आयोजनाको लगानी मोडालिटी तय गरी निर्माण कार्य अघि बढाइने उनले बताए ।
संघ, प्रदेश र स्थानीय तहको सह लगानीमा १०६१ मेगावाट क्षमताको माथिल्लो अरुण, २१० मेगावाट क्षमताको चैनपुर सेती, १०६ मेगावाट क्षमताको जगदुल्ला, ९९.९ मेगावाट क्षमताको तामाकोशी पाँचौ, ७०.३ मेगावाट क्षमताको सिम्बुआ खोला तथा ७७.५ मेगावाट क्षमताको घुन्सा खोला जलविद्युत आयोजनाहरूको निर्माण शुरू गरिने उनले बताए ।
गत वर्ष सरकारले उर्जा क्षेत्रको विकासका लागि ७५ अर्ब १० करोड रुपैयाँ विनियोजन गरेको थियो । यस बर्ष ८७ अर्ब ४५ करोड रुपैयाँ छुट्याएको छ । यो वर्ष १२ अर्ब ३५ करोड रुपैयाँ ऊर्जा क्षेत्रको विकासका लागि बजेट वृद्धि गरिएको हो ।
