नेपाल पूर्वाधार 
तनहुँ। जिल्लाको व्यास नगरपालिका-१ स्थित भादगाउँ खानेपानी तथा सरसफाइ उपभोक्ता संस्थाले ऋण लिएर वडा बासीमा खानेपानी पुर्याउने योजना साकार हुन लागेको छ । नेपाल सरकारको ७० प्रतिशत ऋण र संस्थाको ३० प्रतिशत सहलगानीमा मादीनदी लिफ्ट खानेपानी आयोजनाको निर्माण कार्य अघि बढाइएको थियो ।
आयोजनाको समग्रमा हालसम्म ४५ प्रतिशत कार्य सम्पन्न भइसकेको संस्थाका व्यवस्थापक ईश्वर श्रेष्ठले जानकारी दिनुभयो । कूल २६ करोड रुपैयाँ लागतमा निर्माण सम्पन्न हुने उक्त आयोजनाको ठेक्का पराजुली कन्स्ट्रक्सनले पाएको थियो।
उक्त संस्थाले सानाठूला गरी ४ वटा खानेपानी योजनाबाट वडा बासीलाई पानी वितरण गर्दै आए पनि प्रशस्त मात्रामा खानेपानी आपूर्ति गर्न नसकेपछि मादीनदी लिफ्ट सहलगानीमा आयोजना सुरु गरेको हो । भादगाउँ सहलगानी खानेपानी आयोजनाअन्तर्गत ५२ किमीमध्ये करिब ४२ किमी दूरीमा शाखा लाइनका खानेपानी पाइप बिच्छ्याइ सकिएको छ ।
त्यसैगरी, मुख्य पाइप लाइनको २.१ किलाेमिटर दूरीमा पाइप पुर्ने कार्य सम्पन्न भइसकेको छ । मादीनदी किनारमा सम्पवेलको निर्माण अन्तिम चरणमा पुगेको छ भने अर्को सम्पवेल खन्न सुरु गरिएको छ ।
त्यसैगरी, सेडिमेन्टेसन ट्याङ्कीको ९० र स्लो ट्याङ्कीको ४० प्रतिशत निर्माण सम्पन्न भइसकेको छ । २०८० भदौभित्र सम्पन्न गर्ने गरी उक्त आयोजनाको सम्झौता पश्चात निर्माण कार्य तीव्र रूपमा अघि बढाइएको हो ।
व्यास नगरपालिका–४ को चुरेखोल्सीस्थित मादीनदी किनारबाट लिफ्ट गरी करिब ५ किलोमिटर दूरीमा रहेको रिजर्भ ट्याङ्कीमा पानी सङ्कलनपश्चात् वडा बासीलाई पानी वितरण गरिने छ । मुख्य खानेपानी ट्याङ्की रहने अमिली भञ्ज्याङबाट शाखा ट्याङ्की रहने भदुरसम्म मुख्य खानेपानीको पाइप पनि बिच्छ्याउन थालिएको संस्थाका अध्यक्ष चिजबहादुर दरैले बताए ।
उक्त पम्प हाउसमा दुईवटा मोटरबाट प्रतिसेकेन्ड २६ लिटर पानी तान्न सकिन्छ । वर्षायाम सुरु हुनुअगावै मादीनदी किनारमा सम्पवेल भवन निर्माण गर्ने लक्ष्य राखिएको छ । २०५६ मा उक्त खानेपानी संस्था स्थापना गरी ५२ वटा सार्वजनिक धाराबाट पानी दिन थालेको संस्थाले हालसम्म दुई हजार छ सय बढी निजी धारा जडान गरी पानी उपलब्ध गराउँदै आएको छ ।
