नेपाल पूर्वाधार 
काठमाडौं । हाइड्रो कन्सल्ट इन्जिनियरिङ कम्पनीले कर्णाली प्रदेशको हुम्लामा १७३ मेगावाटका २ अर्धजलाशय जलविद्युत आयोजनाको अध्ययन गर्ने भएको छ । कम्पनीले ७० मेगावाटको चुवाखोला अर्धजलाशय र १०३ मेगावाटको माथिल्लो चुवा लुरुप्या अर्धजलाशय जलविद्युत आयोजनाको सम्भावता अध्ययन गर्न लागेको हो ।
यी २ अर्धजलाशलय जलविद्युत आयोजनाको सम्भाव्यता अध्ययन गर्न प्रवद्र्धक कम्पनीहरूसँग सम्झौता भएको कम्पनीका प्रमुख कार्यकारी अधिकृत मनोहर श्रेष्ठले बताए । उनका अनुसार चुवा खोला आयोजनाको प्रवर्द्धक बिजबेल इनर्जी र माथिल्लो चुवा लुरुप्या आयोजनाको प्रवर्द्धक नेपाल पोर्टफोलियो इनर्जी कम्पनीसँग सम्झौता भएको छ ।
सम्झौता अनुसार हाइड्रो कन्सल्टले तोकिएको अवधिभित्र दुवै आयोजनाको सम्भाव्यता अध्ययन गर्नेछ । सम्झौता भएको मितिले अबको डेढ वर्षभित्र दुवै आयोजनाको सम्भाव्यता अध्ययनको काम पूरा गर्नुपर्ने श्रेष्ठले जानकारी दिए ।
हुम्लामा पहिचान भएका यी आयोजनाको अध्ययन अनुमतिपत्र विद्युत विकास विभागबाट जारी भइसकेको छ । एउटै समूहले २ वटा छुट्टा छुट्टै कम्पनीमार्फत यी २ जलविद्युत आयोजना निर्माण गर्न लागेको हो ।
बुटवल पावर कम्पनी (बिपिसी) को हाइड्रो कन्सल्ट नेपाली परामर्शदाता कम्पनी हो । यो कम्पनीले नेपाल, पाकिस्तान बाहेक अफ्रिकी मुलुकसम्म पुगेर जलविद्युत सम्बन्धि परामर्श सेवा दिएको छ । हाइड्रो कन्सल्टले नेपालमा पनि दर्जनौं आयोजनामा परामर्शदाताकोरूपमा काम गरेको छ ।
