नेपाल पूर्वाधार 
झापा । झापास्थित कन्काई नगरपालिकाले पेट्राेलियम खपत घटाउन विद्युतीय सवारी खरिद गरेको छ । नगरपालिका बढ्दो पेट्रोलियम पदार्थको खपत घटाइ विद्युत खपत बढाउन पहिलो चरणमा २ वटा २ पाङ्ग्रे विद्युतीय सवारी खरिद गरेको हो ।
बढ्दो इन्धन आयात घटाउन र विद्युतकाे प्रयोग बढाउन विद्युतीय सवारी साधन खरिद गरिएको नगरपालिकाका नगरप्रमुख राजेन्द्रकुमार पोखरेलले बताए । “विद्युत उत्पादनमा नेपाल आत्मर्निभर बन्दै गएको छ”, उनले भने, “तर, पनि समय अनुकूल विद्युत प्रयोग हुन सकेको छैन । यही कारण हामी पनि विद्युतीय सवारी खरिद गर्ने निर्णयमा पुगेका हाैं ।”
उनले विद्युतीय सवारी साधनकाे उपयाेगले विद्युत खपत बढ्नुका साथै पेट्रोलियम पदार्थकाे आयात प्रतिस्थापनमा सहयोग पुग्ने बताए । आफ्नै मुलुकमा उत्पादित ऊर्जा प्रयोग गरेर आफैं समृद्ध बन्नेतर्फ स्थानीयस्तरबाट कदम चालिनुपर्ने उनकाे भनाइ छ ।
इन्धन खर्चलाई मितव्ययी बनाउन, वातावरण र ध्वनि प्रदूषण पनि कम हुने भएकाले कनकाई नगरले परीक्षणका लागि विद्युतीय मोटरसाइकल र स्कुटर खरिद गरेको नगरप्रमुख पोखरेलले बताए । अहिले परीक्षणका लागि दुई वटा सवारी साधन खरिद गरेसँगै कन्काईमै २ वटा चार्जिङ स्टेसन निर्माण गर्ने तयारी गरिरहेको नगरपालिकाका योजना प्रमुख विवेक भण्डारीले बताए ।
