नेपाल पूर्वाधार 
ढोरपाटन । वर्षौंदेखि निर्माणाधीन रहेका पाँच मोटरेवल पुल यस वर्ष सम्पन्न हुने भएका छन् । संघीय सरकारअन्तर्गतको सडक डिभिजन कार्यालय बागलुङमार्फत निर्माण भइरहेका पाँच वटा पुलका योजना करिब अन्तिम चरणमा पुगेका हुन् ।
बागलुङ र म्याग्दी जिल्लाको विभिन्न खोलामा बन्दै गरेका पुल सम्पन्न गर्नेगरी काम भइरहेको सडक डिभिजन कार्यालयले जनाएको छ । जैमिनी नगरपालिका–१ जैमिनीघाटदेखि पर्वतको फलेवास नगरपालिका–६ जोड्ने गरी कालीगण्डकी नदीमाथि मोटरेवल पुल बन्न थालेको ७ वर्ष बढी भए पनि हालसम्म काम सम्पन्न हुन सकेको छैन ।
दुई जिल्ला जोड्ने पुल २०७३ असोज ९ गते सम्झौता भएर काम सुरु भएको थियो । निर्माण कम्पनीले कामलाई निरन्तरता नदिँदा अहिलेसम्म काम नसकिएको सडक डिभिजन कार्यालयका सूचना अधिकारी एवं इन्जिनियर अमर अधिकारीले बताए । उनका अनुसार अहिले थप कामदार परिचालन गरेर काम भइरहेको छ ।
१३ करोड १२ लाख ४९ हजार ३६४ रुपैयाँ लागतमा बन्दै गरेको यो पुलको हालसम्म ८० प्रतिशत काम भएको इन्जिनियर अधिकारीले जानकारी दिए । सम्झौता भए अनुसार २०७५ चैत ९ मा सक्नुपर्नेमा हालसम्म ५ पटक म्याद थप गरिएको उनकाे भनाइ छ ।
असार मसान्तसम्म म्याद रहेको हुँदा सरासर काम गरे सकिने स्थिति रहेको उनले बताए । पुल निर्माणका लागि र सुवा श्रीगित/फेवा जेभीले जिम्मा लिएको थियो ।
बागलुङकै बडिगाड गाउँपालिका–७ को कालीरहदेखि मालारानी जोड्ने गरी बडिगाडखोलामा पुल निर्माण सुरु भएको तीन वर्ष बढी भयो । २०७९ फागुन २७ सम्म सक्ने गरी २०७७ कात्तिक २७ मा सम्झौता भएको थियो ।
७ सात करोड ६५ लाख ९९ हजार ६१२ रुपैयाँ लागतमा निर्माण भइरहेको उक्त पुलको काम ७५ प्रतिशत भएको इन्जिनियर अधिकारीले बताए । रायामाझी/राजेश्वरी/पिटीआर अधिकारी जेभीले जिम्मा लिएको थियो । उनका अनुसार यस पुलको काम पनि असार मसान्तभित्र सकिनेछ ।
जिल्लाको तमानखोला गाउँपालिका–२ स्थित बोङ्गाखोलामा पुल निर्माण सुरु भएको तीन वर्ष बढी भयो । निर्माण कम्पनीले लामो समयसम्म काम नगर्दा अलपत्र परेको थियो । हाल पेटी ठेकेदारमार्फत काम भइरहेको छ ।
२०७७ पुस ६ गते सम्झौता गरी २०७९ पुससम्म सम्पन्न गर्ने भनिए पनि आधा मात्रै काम गरेको हुँदा अघिल्लो वर्ष पहिलो पटक म्याद थप गरिएको सडक डिभिजन कार्यालयका सूचना अधिकारी एवं इन्जिनियर अधिकारीले बताए ।
उनका अनुसार २ करोड ७१ लाख २७ हजार ९६४ रुपैयाँ लागतमा बन्दै गरेको उक्त पुल हालसम्म ७० प्रतिशत मात्रै काम सकिएको छ । पुल निर्माणको जिम्मा कान्तिपथ कन्स्ट्रक्सनलाई असार मसान्तसम्म काम गर्ने समय दिइएको छ ।
म्याग्दीको सिङ्गा तातोपानीस्थित म्याग्दी खोलामा निर्माण भइरहेको पुल कम्पनीले पटकपटक म्याद थप गरिएको थियो । उक्त पुलको काम अहिले अन्तिम चरणमा पुगेको जनाइएको छ ।
२०७५ जेठ २५ गते सम्झौता भएर काम सुरु भएको उक्त पुल निर्माणका लागि ठेकेदारले पाँच पटक म्याद थप गरेको सडक डभिजिन कार्यालय बागलुङले जनाएको छ । निर्माण कम्पनीले २०७७ जेठ २५ मा सक्ने गरी सम्झौता भए पनि पाँच पटक म्याद थपेर हाल काम अन्तिम चरणमा पुर्याएको इन्जिनियर अधिकारीले बताए । उनका अनुसार १० करोड ७२ लाख १२ हजार ३०३ रुपैयाँ लागतमा निर्माण भइरहेको छ । लुम्बिनी/प्राकृतिक जेभीले याे पुल निर्माणकाे जिम्मा लिएको थियो ।
म्याग्दीको अर्मनमास्थित म्याग्दीखोलामा २०७५ पुस २५ गते सम्झौता गरी पुलको काम अगाडि बढाइएको थियो ।२०७७ पुस २५ सकिनुपर्नेमा चौथो पटक म्याद थप गरेर हाल अन्तिम चरणको काम भइरहेको अधिकारीले जानकारी दिए ।
११ करोड २४ लाख २५ हजार ५२ रुपैयाँ लागतमा बन्न थालेको उक्त पुल लुम्बिनी/प्राकृतिक जेभीले जिम्मा लिएको थियो । सबै पुल एकै पटक सम्पन्न गर्नुपर्ने बाध्यता रहे पनि पर्याप्त बजेट नभएको उनले बताए ।
“निर्माण कम्पनीलाई असार मसान्तसम्म काम सक्न ताकेता गरिरहेका छौँ । पार्यप्त बजेट छैन, आंशिक मात्रै छ । बजेट आयो भने असार मसान्तमा सबै पुल निर्माण भई सक्छन्”, अधिकारीले भने , “केही वर्ष अगाडिनै सकिनुपर्नेमा अहिले अन्तिम चरणमा पुगेका छन् । पाँचवटै पुल असार मसान्तअगावै सञ्चालनमा आउने अपेक्षा गरेका छौँ । निर्माण कम्पनीले पनि सोहीअनुसार धमाधम काम गरिरहेका छन् ।”
जैमिनी घाटमा बन्न थालेको पुललाई निर्माण कम्पनीले बेवास्ता गर्दा समयमै सम्पन्न हुन नसकेको जैमिनी नगरपालिकाका उपप्रमुख हरिहर शर्माले बताए । पुल नबन्दा बागलुङको दक्षिण भेग र पर्वतका हजारौँ नागरिकले सास्ती खेप्नुपरेको उनकाे भनाइ छ ।
नगरपालिकाले निरन्तर दबाब दिएपछि अहिले धमाधम काम गरिरहेको उनले बताए । पुल बनेपछि स्थानीयलाई वारपार गर्नुका साथै २ जिल्लामा व्यापारका हिसाबले सहज हुने शर्माले बताए ।
“यतिका समयसम्म पुल बन्न नसक्नु लापार्वाही हो । विकासका लागि राज्यले करोडौँ खर्च गरेको छ । कहिलेकाहीँ निर्माण व्यवसायीले काम नगर्दा नागरिकले विकासको अनुभूति गर्न नपाउने अवस्था हुन्छ”, शर्माले भने, “यो वर्षभित्रै पुल बन्ने विश्वास लिएका छौँ । बन्यो भने बागलुङ र पर्वत दुवै जिल्लावासीलाई सहज हुनेछ ।”
