नेपाल पूर्वाधार 
चितवन । भरतपुर महानगरपालिका–१७ मा सिँचाइका लागि २ वटा डिप बोरिङ र १८ वटा स्यालो ट्युबेल सञ्चालनमा ल्याइएकाे छ । १७० बिघा खेतीयाेग्य भूमिमा सिँचाइ सुविधा पुर्याउन यी डिप बोरिङ र स्यालाट्युबेल निर्माण गरी सञ्चालनमा ल्याइएकाे हो ।
डिप बाेरिङ र स्यालाे ट्युबेल सञ्चालनकाे बिहीबार उद्घाटन गरिएकाे छ । महानगरप्रमुख रेनु दाहालले एक कार्यक्रमकाबीच ती सिँचाइ आयोजनाको उद्घाटन गरेकी हुन् ।
१८ वटा स्यालो ट्युबेल निर्माणका लागि चितवन भूमिगत संयोजनात्मक जल सिँचाइ आयोजनाले एक करोड ३५ लाख रुपैयाँ र दुईवटा डिप बोरिङ निर्माणका लागि एक करोड ५८ लाख रुपैयाँ खर्च गरेको छ । सिँचाइका लागि डिप बोरिङ र स्यालो ट्युबेल उद्घाटन भएसँगै स्थानीय उत्साहित भएका छन् ।
कार्यक्रमलाई सम्बोधन गर्दै महानगर प्रमुख दाहालले महानगरभित्र सिँचाइको अभावले बाली लगाउन सकिएन भन्ने अवस्था हट्दै गएको बताइन् । भरतपुरमा सञ्चालित भूमिगत र सतह सिँचाइले कृषकको मुहारमा खुसी ल्याएको उनकाे भनाइ थियो ।
“पहिलाको सुख्खाग्रस्त ठाँउ हाराभरा भएका छन् । एक बाली हुने ठाँउमा चार किसिमका बाली हुन थालेका छन् ,”उनले भनिन् । भरतपुरमा भूमिगत सिँचाइ, नारायणी लिफ्ट सिँचाइ र केरुङ्गा घोल सिँचाइ परियोजना एक साथ सञ्चालनमा आउँदा यहाँका जमिनमा बाह्रैमहिना सिँचाइ पुगेको उनले बताइन् ।
महानगर क्षेत्रभित्र सिँचाइ आयोजनाबाट ५० वटा डिप ट्युबेल, तीन सय ३० स्यालो ट्युबेल र महानगरले ७ सय बढी स्यालो ट्युबेल निर्माण गरिरहेकाे प्रमुख दाहालले जानकारी दिइन् ।
कार्यक्रममा भूमिगत सिँचाइ आयोजनाका प्रमुख देवकुमार स्याङ्बोले भूमिगत सिँचाइका कारण भरतपुरको उत्पादनमा वृद्धि भई कृषकले मनग्य आम्दानी गर्न सफल भएकाे बताए । भरतपुरमा प्राकृतिक रुपमा मात्र सिँचाइ गरी बाली लगाउने अवस्थाको अन्त्य भएको उनकाे भनाइ थियो ।
भरतपुरमा भएका ट्युबेलले कूल ६ हजार १ सय २० बिघा क्षेत्रफलमा सिँचाइ हुने आयोजनाका प्रमुख स्याङ्बोले जानकारी दिए । उनका अनुसार यहाँका कृषकले नारायणी लिफ्ट र केरुङ्गा जल सिँचाइ आयोजनामार्फत सिँचाइ सुविधा लिइरहेका छन् ।
