नेपाल पूर्वाधार 
काठमाडौं । आइडिया स्टुडियो नेपालले आफ्नो विभिन्न सिजनका आइडिएटरले विकास गरेका तीन वटा प्रडक्ट सार्वजनिक गरेको छ । आइतबार राजधानीनमा आयोजित पत्रकार सम्मेलनमार्फत ती प्रडक्ट सार्वजनिक गरिएको हो ।
आइडिया स्टुडियो सिजन ५ का आइडिएटर डा. भीम प्रसाद काफ्लेले विकास गरेको ‘न्यानो प्याड’, कलेज आइडिया हन्ट २०२२ का आइडिएटर्स अनिश गिरी, देवी कमारी गिरी, नारायण थापा मगर र यमनाथ गिरीले विकास गरेको ‘बायो ग्रीन’ रहेका छन् ।
त्यस्तै, प्रशन्ना स्याउला र प्रज्वल जोशीले विकास गरेको ‘वी फर नेचर’ सार्वजनिक गरिएको छ ।
न्यनोप्याड
न्यनोप्याड आइडिएटर डा. भीम प्रसाद काफ्लेले तयार गरेका हुन् । न्यानोप्याड पुनः प्रयोग गरेर तताउने एक यन्त्र हो ।
यो जुनसुकै बेला र जहाँसुकै प्रयोग गर्दा साधारण मेटल फ्लेक्सको साथ तुरुन्तै ‘अन’ गर्न सकिन्छ । न्यानोप्याड सक्रिय भएपछि डेढ घण्टाको लागि न्यानो रहन्छ ।
न्यानोप्याड जाडो मौसममा वृद्धाहरुको र सुत्केरीको लागी उपयोगी छ । न्यनोप्याड सबै अन्तर्राष्ट्रिय संस्थाहरुबाट स्वीकृत लिइसकेको तर नेपालमा भने लिन बाँकी रहेको उत्पादन हो ।
बजारमा उत्पादनहरू पठाउनु अघि छाला चिकित्सक र अर्थोपेडिक्स द्वारा प्रमाणित गर्ने र प्रमाणित भइसकेपछि बजारमा पठाउने तयारी छ । न्यनोप्याडले ५५ डिग्री सेल्सियसको तापक्रम प्रदान गर्छ ।
वी फर नेचर
वी फर नेचरका टीमले प्रयोग भएका अथवा फाल्नको लागि राखिएको जिन्स, कटराइजका कपडाको प्रयोग गरेर जुत्ता, चप्पल, ह्यान्ड ब्याग लगायतका सामान तयार गरेका छन् ।
वी फर नेचर भन्ने अवधारणाका साथ उनीहरुले फाल्नको लागि राखिएका कपडाहरु कच्चा पदार्थको रुपमा प्रयोग गर्ने र तिनीहरुलाई उपयोगी उत्पादहरुमा रुपान्तरण गर्नेछन् ।
रुपान्तरण गरिएका नयाँ सामानहरु हाम्रो दैनिक जीवनमा प्रयोग गर्न मिल्नेछ । आफ्नो प्रडक्ट लञ्च गर्न आइडिया स्टुडिया एक राम्रो प्लेटफर्म भएको आइडिएटर प्रज्वल जोशीले बताए । लन्च गरिएका प्रडक्ट खरिद गर्नको लागी सोसल मिडिया पेज ‘वी फर नेचर’ मा अर्डर गर्न सकिनेछ ।
बायो ग्रीन
कलेज आइडिया हन्ट २०२२ का आइडिएटरहरुले यो प्रडक्ट तयार गरेका हुन् । बायो ग्रीन भन्नाले नयाँ अंकुरित जरा भएका अपरिपक्व बिरुवाहरु हुन् ।
जुन कोटिलेडन र पातहरु सामान्यतया बीउ रोपेको १० देखि १४ दिनको बीचमा तरकारीको रुपमा प्रयोग गर्न तयार हुन्छ । बायो ग्रीनअन्तर्गत रातो मूली, रातो गोभी, मेथी, अनाज, जौ, तोरीलगायतका तरकारीहरू फलाइएका छन् ।
राष्ट्रिय आविष्कार केन्द्रबाट स्वीकृति पाइसकेपछि २ वर्षको अनुसन्धान पश्चात साकाहारी र मांसाहारी दुवैको स्वास्थ्यको लागी नै बायोग्रीन उपयोगी भएको आइडिएटर यमनाथ गिरीले बताए ।
उनीहरुको उत्पादन खरिद गर्न अनलाइन र फेसबुक पेजमा सम्पर्क गर्न सकिन्छ र उत्पादन केन्द्रमा गएर पनि खरिद गर्न सकिने बताएका छन् ।
