नेपाल पूर्वाधार 
काठमाडौं । नेपालको साहसिक र अनुभवमा आधारित पर्यटन प्रबर्द्धन गर्ने
उद्देश्यले ललितपुरमा आठौं नेपाल राइडर्स मिट हुने भएको छ । नेपाल पर्यटन
बोर्डको सभा हलमा सोमबार आयोजित पत्रकार सम्मेलनमार्फत् आगामी फागुन २ देखि
४ गतेसम्म ललितपुरको गोदागरी २ स्थित चापखर्कमा नेपाल राइडर्समिट हुने
आयोजक द हिमालयन मोटरसाइकल एक्सपेरियन्सका संयोजक अर्जुन थापाले जानकारी
गराएका छन् । उक्त कार्यक्रममा नेपालसहित भारत, भुटान र म्यानमारलगायतका
मुलुकबाट ५५० भन्दा बढी राइडर सहभागी हुनेसमेत संयोजक थापाले जानकारी
गराएका छन् ।
कार्यक्रमलाई सम्बोधन गर्दै नेपाल पर्यटन बोर्डका वरिष्ठ प्रबन्धक सूर्य
थपलियाले नेपालको पर्यटन प्रबर्द्धनका लागि ‘मोटरबाइक राइडिङ’ महत्वपूर्ण
साधन हुने बताएका छन् । वरिष्ठ प्रबन्धक थपिलियाले यस किसिमका कार्यक्रमले
परम्परागत पदयात्रा र पर्वतारोहणभन्दा बाहिरका पर्यटन उत्पादनलाई
प्रवर्द्धन गर्दै रोड ट्रिप, एडभेन्चर टुरिज्म र क्रस–बोर्डर पर्यटन
विस्तारमा योगदान पुग्ने बताएका छन् । उनले भने, “यस नेपाल राइडर्स मिटले
नेपालको साहसिक र अनुभवमा आधारित पर्यटन प्रबर्द्धनका लागि महत्वपूर्ण
योगदान गर्नेछ । नेपालको दक्षिण छिमेक भारतमा मात्रै बाइक राइडिङ
संस्कृतीलाई प्रबर्द्धन गर्दै नेपालमा भारतीय राइडर ल्याउन सकेमा नेपालको
पर्यटक आगमन फड्को मार्ने देखिन्छ ।
बाइक राइडिङ केवल घुम्ने मात्र नभएर
नेपालको संस्कृती, प्रकृतीसँग पनि साक्षात्कार हुने अवसर प्राप्त हुनेछ ।“
त्यसैगरी आयोजक संस्था फोरे नेपालका सकिल गौचन, सहयोगी संस्था रोयल
इन्फिल्डका निर्देशक मेगराज पौडेल, द हिमालयन क्लबका प्रमुख अनिल
काफ्लेलगायतले नेपाल राइडर्स मिट राइडिङ समुदायको महत्वपूर्ण पर्व भएको
उल्लेख गर्दै बाइक राइडिङलाई पर्यटन प्रबर्द्धनको महत्वपूर्ण उत्पादनको
रुपमा विकास गर्नुपर्ने बताएका छन् । उनीहरुले यस बाइक राइडमार्फत् भातृत्व
विकासका साथै नेपालको संस्कृती प्रबर्द्धन गर्न पनि टेवा पुग्ने बताएका छन्
।
यस कार्यक्रममा हुने सहभागिताले नेपाललाई क्षेत्रीय साहसिक पर्यटनको आकर्षक
गन्तव्यका रूपमा स्थापित गर्न मद्दत पुग्ने अपेक्षा गरिएको छ । सन् २०१३ मा
बर्दियाबाट सुरु भएको नेपाल राइडर्स मिट केही व्यक्तिबाट सुरु भएको र हाल
५०० भन्दा बढी राइडर्स सहभागी हुँदै छन् । यस कार्यक्रममार्फत नेपालका
प्राकृतिक सौन्दर्य, सांस्कृतिक विविधता, रमणीय राजमार्ग र आतिथ्य
संस्कृतिलाई प्रवर्द्धन गर्ने लक्ष्य लिइएको छ । आयोजकका अनुसार मोटरसाइकल
पर्यटनले गन्तव्यलाई नजिकबाट अनुभव गर्ने अवसर प्रदान गर्नुका साथै
यात्राका कथाहरूलाई अन्तर्राष्ट्रिय स्तरमा प्रवाह गर्न प्रभावकारी माध्यम
बन्नेछ ।
नेपाल राइडर्स मिटले यसअघि बर्दिया, चितवन, मनाङलगायतका विभिन्न ठाउँमा
कार्यक्रम गरिसकेको छ । र्यक्रमले डिजिटल प्लेटफर्म, राइडर नेटवर्क र
सञ्चारमाध्यममार्फत नेपालका पर्यटन गन्तव्यहरूको अन्तर्राष्ट्रिय
प्रचार–प्रसारमा सहयोग पुर्याउने विश्वास लिइएको छ ।
