नेपाल पूर्वाधार 
काठमाडौं । होङ्सी शिभम सिमेन्ट प्रालिले ९ महिनामा ९ अर्ब २५ करोड १० लाख रुपैयाँको व्यापार गरेको छ ।
२०२५ को ९ महिनामा कम्पनीले ९ अर्ब २५ करोड १० लाख रुपैयाँको व्यापार गरेको हो ।
‘होङ्सी’ नाममा सिमेन्ट उत्पादन, बिक्री तथा वितरण गर्ने यो कम्पनीले यसअघि २०२१ मा १७ अर्ब ४५ करोड ७० लाख रुपैयाँको व्यापार गरेको यो कम्पनीले २०२२ मा १७ अर्ब ४ करोड ४० लाख रुपैयाँको व्यापार गरेको थियो । त्यसयता कम्पनीको व्यापार निरन्तर घट्दै गएको छ ।
२०२४ मा यो कम्पनीले ११ अर्ब ९२ करोड ६० लाख रुपैयाँको व्यापार गरेको थियो भने २०२३ मा कम्पनीको व्यापार १३ अर्ब ८१ करोड ११ लाख रुपैयाँ थियो ।
२०१५ मा खुलेको यो कम्पनीले सिमेन्ट उत्पादन तथा क्लिंकर उत्पादन गर्ने गर्छ । वार्षिक २० लाख मेट्रिक टन क्लिंकर तथा २३ लाख मेट्रिक टन ग्राइन्डिङ क्षमता रहेको कम्पनीको कारखाना नवलपरासीमा रहेको छ ।
कम्पनीको अधिकतम सेयर (७० प्रतिशत) हङकङ रेड लायन सिमेन्ट नम्बर थ्रि लिमिटेडसँग छ भने शिभम होल्डिङ प्रालिसँग ३० प्रतिशत सेयर रहेको छ । यो कम्पनीले होङ्सी ब्रान्ड नाममा ओपिसी र पिपिसी सिमेन्टको उत्पादन गर्दै आएको छ ।
हालका लागि कम्पनीले ६ अर्ब रुपैयाँको कर्जा सुविधाका लागि रेटिङ गराएको छ । इक्रा नेपालले ६ अर्ब रुपैयाँको अल्पकालिन कर्जा सुविधाका लागि ए टु रेटिङ दिएको छ ।
