नेपाल पूर्वाधार 
काठमाडौं । इरानले कतारस्थित अमेरिकी सैन्य बेसमा हमला गरेसँगै मध्यपूर्वको अवस्था झन बिग्रिँदा दोहास्थित नेपाली दुतावासले नेपालीहरुलाई सतर्क रहन आग्रह गरेको छ ।
दुतावासले एक सूचना जारी गर्दै वर्तमान परस्थितिलाई मध्य नगर गरेर कतारमा रहेका नेपालीहरुलाई सतर्क रहन र यथास्थानमै रहन आग्रह गरेको हो ।
कतासको अल-उदैदस्थित एयरबेसमा इरानले सोमबार मिसाइल आक्रमण गरेको छ । गत शनिबार अमेरिकाले इरानका परमाणु केन्द्रमा गरेको आक्रमणको जवाफी हमलाका रुपमा यो आक्रमणलाई हेरिएको छ ।
धेरै नेपालीहरु वैदेशिक रोजगारीका लागि जाने गन्तव्य मुलुकका रुपमा रहेको कतारमा पनि इरान, इजरायल र अमेरिकाबीचको द्वन्द्व बढ्दै गएपछि प्रभाव परेको हो । यस्तोमा त्यहाँ रहेका नेपालीहरुलाई शान्तपूर्वक रहन र कतार सरकारको आधिकारिक सूचना र निर्देशन पालना गर्नसमेत नेपाली दुतावासले अनुरोध गरेको छ ।
दुतावासले जारी गरेको सूचनामा भनिएको छ, ‘नेपाली राजदूतावास, दोहा कतारमा रहनुभएका सबै नेपाली दाजुभाइ दिदीबहिनीहरूका सदैव साथमा रहेको व्यहोरा समेत अवगत गराउन चाहन्छौँ ।’
